Qazaqstan ulttyq geografııalyq qoǵamynyń jumysy jolǵa qoıyldy - K. Másimov
ASTANA. QazAqparat - Búgin QR Premer-Mınıstri Kárim Másimov Qazaqstan ulttyq geografııalyq qoǵamynyń (QUGQ) ІІ seziniń jabylýynda sóz sóıledi, dep habarlady primeminister.kz.
Óz sózinde Úkimet basshysy geografııalyq qoǵamnyń jumysyn qorytyndylady jáne alda atqarylar mindetterdi júktedi.
«Biz ótken jyly bul joldy birge bastadyq, búgin men Qazaqstannyń ulttyq geogafııalyq qoǵamy jumysynyń jolǵa qoıylǵandyǵyn senimmen aıta alamyn»,-dedi K. Másimov.
Premer-Mınıstr Qazaqstannyń Halyqaralyq geografııalyq qoǵamǵa múshelikke ótkendigi, Amerıkalyq geografııalyq qaýymdastyqpen, Orys geografııalyq qoǵamymen, Dúnıejúzilik jabaıy tabıǵat qorymen (WWF) tyǵyz baılanys ornatylǵandyǵy QUGQ-nyń tabystarynyń biri ekendigin atap ótti.
«Geografııalyq qoǵam Qazaqstannyń tabıǵı jáne ekologııalyq murasyn saqtaý baǵytyndaǵy asa mańyzdy jobalardy sátti júzege asyra bastady»,-dep qosty ol. Úkimet basshysy QUGQ-nyń basty mindetteriniń biri - joǵalyp bara jatqan janýarlar túrin saqtap qalý dep esepteıdi. «Turan jolbarysy men Prjevalskıı jylqylaryn qaıta túletýdiń mańyzdy ekendigin atap ótkim keledi. Bıologııalyq tepe-teńdikti jáne alýantúrlilikti qoldaý - geografııalyq qoǵamnyń el bolashaǵy úshin qosqan úlesi bolmaq»,-dedi K. Másimov.
«Alǵashqy tabystar ekogeografııa jónindegi asa mańyzdy da qajetti jumystardy jalǵastyrýda bizdi qanattandyrýy tıis»,-dep qorytty Premer-Mınıstr.
