Qazaqstan Ulttyq banki valıýta naryǵynda úsh aı boıy óktemdik júrgizgen joq
ASTANA. QazAqparat - 2016 jylǵy qyrkúıekten beri úsh aı qatarynan Ulttyq bank valıýta naryǵynda óktemdik júrgizgen joq. Osylaısha, retteýshi bırjadaǵy valıýtalyq saýda-sattyqtarǵa óziniń qatysýyn 0%-ge jetkizdi.
Bul týraly Astanadaǵy Úkimet otyrysynda sóılegen sózinde QR Ulttyq bankiniń tóraǵasy Danııar Aqyshev málim etti.
Onyń aıtýynsha, teńge baǵamy qazirgi ýaqytta oń serpinge ıe irgeli faktorlardyń áserimen ǵana qalyptasady.
«Іshki valıýta naryǵyndaǵy jaǵdaı turaqty. Ulttyq bank syrtqy jáne ishki faktorlardyń áserimen qalyptasatyn irgeli úrdisterge kedergi keltirmeıdi. Qarashanyń sońynda teńgeniń bırjalyq baǵamy jyldyń basynan beri 0,4%-ǵa álsirep, bir AQSh dollary úshin 341,44 teńgeni qurady. Qazirgi ýaqytta naryqta teńge baǵamynyń kún saıyn azdap aýytqýy baıqalady», - dedi D. Aqyshev.
Ol sondaı-aq, munaı óndiretin kóptegen elderdiń munaı óndirý kólemderi men álemdik naryqtaǵy munaı qunynyń ósýin tómendetý týraly ýaǵdalastyǵynan jeltoqsanda teńgeniń nyǵaıý úrdisi baıqalǵandyǵyn aıtty.
«Erkin ózgermeli teńge baǵamy saıasaty rezervterdi birtindep qalpyna keltirýdi bastaýǵa múmkindik berdi», - dep jalǵastyrdy D.Aqyshev. Ol, Ulttyq banktiń altynvalıýta rezervteri qarashanyń sońyna 29,8 mlrd. dollar quraǵanyn habarlady. Jyl basynan bastap 2 mlrd. dollarǵa ósý belgilendi. Ulttyq bank basshysynyń túsindirgenindeı, «altynvalıýta rezervteriniń kólemderin ulǵaıtý negizinen altyn qunynyń ósýimen, sondaı-aq ishki naryqta shetel valıýtasyn satyp alýmen qamtamasyz etilgen».
Bul rette, Ulttyq qordyń valıýtalyq aktıvteri 61 mlrd. dollar qurady. Eldiń rezervteriniń jalpy somasy Ulttyq banktiń derekteri boıynsha, 91 mlrd. dollarǵa jetken nemese ІJÓ-niń 68 paıyzyn quraǵan.
