Qazaqstan Ulttyq banki 25 tonna altyn satyp almaq
ASTANA. 28 aqpan. QazAqparat - 2013 jyly Qazaqstannyń Ulttyq banki 25 tonna altyn satyp alýdy kózdep otyr.
Degenmen, eger elimizde 30 tonna altyn óndirilse, ony da satyp ala alady. Bul týraly Ulttyq bank tóraǵasy G.Marchenko «Praım» agenttigine bergen suhbatynda málimdedi, dep habarlaıdy BNews.kz.
Grıgorıı Marchenko ótken jyly 22 tonna altyn satyp alynǵanyn aıtty. Qazir elimizdiń altyn qory 115 tonnaǵa jetipti.
«Biz 2011 jyldyń kúzinen bastap altyn satyp ala bastadyq jáne aldaǵy úsh jyl boıy onyń jalǵasatynyn aıttyq. Bul mindetter saqtalady. Odan keıin altyn satyp alý jalǵasa ma joq pa ekeni sheshiledi», dedi ol.
Grıgorıı Marchenko ótken jyldyń sońynda «Samuryq-Qazyna» UÁQ qarjysyna salynǵan jańa affınajdy zaýyt iske qosylǵanyna toqtaldy. Munda altyn óndirilip, odan keıin Óskemendegi «Qazmyrysh» zaýytynda oǵan tańba soǵylady.
«Biz tańba soǵylǵan taza quıma altyndy alamyz», dep qorytyndylady Ulttyq bank tóraǵasy.
