«Qazaqstan» ulttyq arnasynda «Ómir ótkelderi» atty jańa otandyq telehıkaıa kórsetiledi
ASTANA. 11 aqpan. QazAqparat - 25 aqpanda «Qazaqstan» ulttyq arnasynda «Ómir ótkelderi» atty jańa otandyq telehıkaıanyń tusaýy kesiledi. Bul týraly «Qazaqstan» respýblıkalyq teleradıokorporatsııasynyń baspasóz hatshysy Tanakóz Tolqynqyzy habarlady.
12 toptamadan turatyn «Ómir ótkelderi» telehıkaıasynda basty keıipker Aısulýdyń rólin Jánııa Jýrınskaıa oınaıdy. Negizgi oqıǵa jelisi shaǵyn saýda ortalyǵynda órbıdi. Aısulý - shet eldiń aldyńǵy qatarly mýzykalyq oqý ornynan bilim alyp júrgen jas skrıpkashy. Kútpegen jerden ol ákesine tosyn syı jasap, Almatyǵa keledi. Alaıda, Qazaqstanda bes jyldaı ýaqyt bolmaǵan mýzykant qyz kútpegen jaǵdaılarǵa kezigedi. Birinshi kúni týǵan úıine kelse, páterdiń esigin jańa ıesi ashpaıdy, al qýatty bıznesmen bolǵan ákesiniń aýyr halde jatqanyn estıdi.
Anasynan jastaıynan aıyrylǵan ójet qyz amalsyzdan kásipker ákesiniń dúkenine túnep shyǵady. Sanaýly kúnge demalýǵa kelgen Aısulý ákesiniń aýyr jaǵdaıyn kórip, onyń qasynda qalýǵa sheshim qabyldaıdy. Týǵan eline bes jyldan keıin oralǵan qyz bıznes pen ómirde ákesiniń jan dostarynyń satqyndyq jasaǵanyna kózi jetedi. Endi onyń ómirlik maqsaty - óner men mýzyka emes, osy bir qıyn jaǵdaıda ákesiniń bıznesimen birge onyń abyroıy men namysyn da qutqaryp qalý bolady.
«Qazaqstan» ulttyq arnasynyń arnaıy tapsyrysymen túsirilgen «Ómir ótkelderi» telehıkaıasynyń qoıýshy rejısseri - Naryn Erlan. Fılmniń qoıýshy operatory Hasan Qydyralıev, kompozıtory Qýat Shildebaev. Rólderde tanymal óner juldyzdary Rahman Omarov, Asylbek Boranbaı, Darııa Júsippen qatar, Erbol Ydyrysov, Omar Qıqymov, Janat Tinbaev, Mereı Mahanov, Ǵanı Qurash t.b akterlar oınaıdy.
Telehıkaıa «Qazaqstan» ulttyq arnasynda dúısenbiden beısenbige deıin saǵat 21.50 kórsetildi.
