«Qazaqstan» ulttyq arnasynan «Sherlok» serıaly aǵylshyn tilinde kórsetiledi
Tańǵy «Tańsholpan» baǵdarlamasy búgin jańa formatta jańa júrgizýshilermen efırge shyqty. Endi tańǵy efır burynǵydan da kóńildi ári tanymdy bolmaq. Tańǵy baǵdarlamanyń jańa júrgizýshileri - Danııar Esen, Baıan Baqkeldi, Irına Ten jáne Dáýlet Bıjanov.
Búginnen bastap «Qazaqstan» Ulttyq telearnasyndaǵy jańalyqtar jańa formatta ári «Basty aqparat» degen jańa ataýmen efırge shyǵady. Jańalyqtar legi ózgerip, elimizde jáne álemde bolyp jatqan ózekti jańalyqtardy obektıvti túrde berýge aktsent qosady. Elimizdiń basty jańalyqtaryn tanymal jýrnalıster Qymbat Dosjan men Danııar Meńlibekov júrgizetin bolady. Aqparattyq-saraptamalyq blok «Basty taqyryp» atty kúndelikti jobamen tolyǵady. Joba avtorlary habar barysynda kúnniń negizgi jańalyqtaryn egjeı-tegjeıli qarastyrady. Baǵdarlamany Meıirjan Álibek júrgizedi.
Al, áleýmettik-saraptamalyq «Másele» baǵdarlamasynyń jýrnalısteri óz zertteýlerin júrgizip, stýdııa qonaqtarymen birge elimizdegi jáne shet memleketterde bolyp jatqan iri oqıǵalarǵa saraptama jasaıdy. Baǵdarlama tizginshisi Nartaı Aralbaıuly ózekti máselelerdi qarastyryp, qoǵamda oryn alyp otyrǵan áleýmettik-ekonomıkalyq problemalardy sheshý joldaryn izdeıdi.
25 naýryzdan bastap senbiniń keshinde jańa mýzykalyq «Án salady mamandar» jobasy efırge shyǵady. Atalmysh jobanyń ereksheligi, jobaǵa qatysýshylardyń mýzykaǵa esh qatysy joq, olar ár salanyń mamandary. Alaıda, qatysýshylardyń barlyǵy án salǵandy unatady, ári mýzykaǵa beıim. Joba barysynda qatysýshylar án salýdan saıysqa túsip, óz mamandyqtarynyń ereksheligimen de bólisip otyrady.
20 naýryzdan bastap, balalardyń demalysy kezinde telearnanyń kishkentaı kórermenderine arnalǵan «Dısneı» kompanııasynyń úzdik anımatsııalyq fılmderi qazaq tilinde sóıleıdi. Aıta ketý kerek, barlyq mýltfılmder «Qazaqstan» telearnasynyń kómegimen sońǵy tehnologııalardy qoldana otyryp dybystalǵan. Alǵash ret halyqtyń súıiktisine aınalǵan mýltfılm keıipkerleri túrli daýysta qazaqsha sóılemek. Sebebi, dybystaýǵa 10-ǵa tarta dýblıaj akterleri tartylǵan. Mýltfılmderdegi mýzykalyq bezendirý orkestrmen súıemeldengen, al, ánderdi dýblıaj akterleri oryndaıdy.
Senbi kúnderi telearna efırinde jekemenshik kınostýdııalar túsirgen otandyq zamanaýı kórkem fılmder legi kórsetiletin bolady. Búgingi tańda otandyq kınoóndiris qarqyndy damyp keledi. Jyl ótken saıyn prokatqa shyqqan qazaqstandyq fılmder sany artýda. Bul fılmder kórermen arasynda keń tanymaldylyqqa ıe bolýda. Oǵan halyqqa toly kınoteatrlar dálel. Mundaı kórsetilim otandyq kınotýyndylardy qoldaý, ózimizdiń zamanaýı fılmderimizdi kórýge jol ashady.
«Qazaqstan» telearnasy birneshe jyl kóleminde tól telehıkaıalaryn túsirýmen aınalysyp keledi.
27 naýryzda «Kózaıym» telehıkaıasy efırge jol tartady. Hıkaıanyń maqsaty - eki otbasy arasynda órbıtin oqıǵalar negizinde óskeleń urpaqtyń tárbıesine qatysty mańyzdy suraqtardy qozǵaı otyryp, eldiń ekonomıkalyq ósimin, mádenı, áleýmettik jetistikterin nasıhattaý.
2017 jyly praım-taım ýaqytta otandyq telehıkaıalarǵa arnalǵan jeke ýaqyt bólinbek.
Ár senbi saıyn telearna efırinde álemniń úzdik óndirýshileriniń qolynan shyqqan kórkem fılmder kórsetiledi. Senbilik keshti komedııa, fentezı, blokbaster, melodrama syndy janrlardaǵy otbasylyq fılmder quraıdy.
Túngi efırdi tanymal rejısserlerdiń kartınalary, klassıka jáne zamanaýı bestsellerler, álemdik kınematograftyń shedevrleri toltyrady.
18 naýryzdan bastap sońǵy jyldardaǵy eń úzdik brıtandyq serıal Benedıkt Kamberbetch basty róldi somdaǵan «Sherlok» týyndysy efırge shyǵady. Bul týyndy qazaq tilindegi sýbtıtrlermen aǵylshyn tilinde kórsetiletin bolady. Túpnusqa negizinde kórsetý - kórermenderge súıikti akterleriniń shynaıy daýysyn estýge, sondaı-aq, fılmniń atmosferasyna túbegeıli enip, aǵylshyn tilin úıden shyqpaı-aq úırenýge múmkindik beredi.
22 naýryzdan bastap «Teń múmkindikter ýaqyty» atty derekti telejýrnal efırge shyǵady. Baǵdarlama qazaqstandyq bıznestiń úzdik jobalary men success story týrasynda áńgime órbitedi.
Sonymen qatar, jańa saıt boıynsha jumystar júrgizilýde. Saıt jańa dızaınmen erekshelenip, paıdalanýshylarǵa barynsha túsinikti, ári jarqyn tústerge toly bolmaq.
