«Qazaqstan» ulttyq arnasynan aty ańyzǵa aınalǵan barlaýshy, qazaqtyń batyr uly Qasym Qaısenov týraly fılm kórsetiledi
ASTANA. 29 sáýir. QazAqparat - Erteń, 30 sáýir kúni saǵat 11.00-de Astana qalasy «QazMedıa Ortalyǵynyń» májilis zalynda Qazaqstan, Reseı, Ýkraına memleketteri birigip túsirgen «Qasym» kórkem fılminiń tusaýkeser rásimi ótedi.
4 serııaly kórkem týyndyny «Qazaqstan» RTRK, KTK, « Birinshi arna Eýrazııa» telearnasy men INTRA Communication (Reseı) jáne FILM UA (Ýkraına) birlesip túsirdi.
Fılm - aty ańyzǵa aınalǵan barlaýshy, qazaqtyń batyr uly Qasym Qaısenovtyń birtýar bolmysy jaıynda. Dıversanttar tobyn basqaryp maıdan shebine engen Qasymnyń barlyq sarbazdary satqyndyqtyń kesirinen fashısterdiń qolynan opat bolady. Japadan jalǵyz jaý shebinde qalǵan Qasym ózine berilgen tapsyrmany qaıtpas qaısarlyqpen oryndap, jaýdyń qarý-jaraq qoımasyn joıady. Soǵys ýaqytyndaǵy satqyndyq, kúdik, qorqynyshqa qaramaı jergilikti halyq Qasymǵa kómekke keledi. Nemistiń aqsúıek barlaýshysy qazaqtyń jaýjúrek batyryna tótep bere almaıdy.
Belgili reseılik rejısser Leonıd Belozorovıch pen stsenarıı avtory Andreı Kýreıchık fılm jelisine zamanaýı kınematografııa arsenaly - psıhologııalyq qaıshylyqtar, joıqyn shaıqas pen lırıkalyq kórinister arqyly erekshe reńk bergen.
Kórkem fılmdegi negizgi keıipkerdiń rólin astanalyq Q.Qýanyshbaev atyndaǵy drama teatr akteri Qýandyq Qystyqbaev somdady. Sonymen qatar, kórkem týyndyda Vladımır Gostıýhın, Mıhaıl Evlanov, Aleksandr Lykov, Aleksandr Petrov, Marııa Lýgovaıa syndy tanymal akterlar da oınaıdy.
Fılm 7-10 mamyr aralyǵynda «Qazaqstan» ulttyq arnasynan 19.30-da kórsetiledi.
