«Qazaqstan» Ulttyq arnasy televızııalyq rynokqa qatysýshylar arasynda kóshbasshy atandy
ASTANA. 14 aqpan. QazAqparat - TNS Gellap Medıa Azııa (TNS Gallup Media Asia) zertteý kompanııasynyń málimetteri boıynsha 2013 jyldyń 1 qańtar men 10 aqpan aralyǵynda «Qazaqstan» Ulttyq telearnasy 100 myńnan tómen turǵyndary bar eldi mekender, ıaǵnı shaǵyn qalalar, aýdandar men aýyl turǵyndary arasynda 23,3% ortasha táýliktik úles kórsetkishimen birinshi orynǵa shyqty. Bul týraly Ulttyq arnanyń baspasóz qyzmetinen habarlady.
Osylaısha 6+ baǵamy boıynsha, (6 jastan joǵary qazaq jáne orys tildi kórermender arasynda) Ulttyq arna qazaq tildi aýdıtorııada ǵana emes, barlyq televızııalyq aýdıtorııa boıynsha da otandyq ózge telearnalardyń aldyna shyǵyp, jetekshi pozıtsııany nyq ustap tur.
Osydan eki jyl buryn Elbasy óziniń Joldaýynda «Aldymyzda mynadaı mindet tur: 2017 jyly memlekettik tildi meńgergen qazaqstandyqtardyń sany kem degende 80%, al 2020 jylǵa qaraı kem degende 95%-ǵa jetýi tıis. Endi 10 jyldan keıin mektep bitirýshi túlekter 100% memlekettik tildi biletin bolady. Biz bul úshin bárin jasap jatyrmyz», - dep kórsetken edi.
«Qazaqstan» ulttyq arnasy elektrondy buqaralyq aqparat quraldarynyń arasynan birinshi bolyp Elbasynyń osy joldaýda aıtylǵan mindetterin oryndaýǵa kiristi. Memleket basshysynyń tikeleı tapsyrmasy boıynsha «Qazaqstan» Ulttyq arnasy 2011 jyldyń qyrkúıeginen 100% qazaq tilinde habar tarata bastady. Alǵashqyda, el turǵyndarynyń 95% qazaq tilinde sóılep ketýine kúmán keltirgender, Ulttyq arnanyń reıtıng jınap, úlken suranysqa ıe bolatynyna senimsizdikpen qaraǵan edi. Biraq, joǵarydaǵy naqty derekter kórsetkendeı, «Qazaqstan» Ulttyq arnasy kórermen suranysyn qanaǵattandyryp qana qoımaı, halyqtyń kókeıindegisin taba bildi.
Ulttyq arna aqparattyq-saraptamalyq, áleýmettik, tanymdyq habarlary, qyzyqty megajobalary men tartymdy telehıkaıalary arqyly kórermen kóńilinen shyqty.
Zertteý bastalǵaly (2012 jyldyń sáýir aıynan beri) alty jastan joǵary tek qazaq tildi kóreremender sany boıynsha, «Qazaqstan» Ulttyq arnasy 30,6 paıyzdyq ortasha táýliktik úles kórsetkishimen birinshi orynda keledi. Eń qýanarlyǵy joǵaryda atap ótkenimizdeı, 100 myńnan tómen turǵyndary bar eldi mekenderdegi alty jastan joǵary qazaq jáne orys tildi kóreremender arasynda da 23,3 paıyzben bıylǵy jyldyń basynan «Qazaqstan» Ulttyq arnasy ózge habar taratýshylardyń aldyna shyǵyp, jetekshi orynǵa turaqtady.
Joǵaryda kórsetilgen TNS Gellap Medıa Azııa zertteý kompanııasynyń málimetteri 100% memlekettik tilde habar taratatyn «Qazaqstan» telearnasynyń ózge ulttar arasynda da úlken suranysqa ıe ekenin dáleldeıdi. Bul - «Memlekettik til - barsha qazaqstandyqtardy biriktirýshi faktor bolýy tıis», - degen Elbasynyń sózi shyndyqqa aınala bastaǵanynyń naqty kórinisi.
