«Qazaqstan» ulttyq arnasy kórermenderine zańgerler bir kún boıy tegin keńes bermek
ALMATY. QazAqparat - Maýsymnyń 23-inde ulttyq arna esigi ádildik izdep kelýshilerge ashyq bolmaq. Bul kúni «Zań jáne biz» baǵdarlamasynyń redaktsııasy «Qazaqstan» ulttyq telearnasynyń konferents-zalynda kórermendermen suhbattasyp, bir kún boıy tegin zańgerlik keńester berýdi josparlap otyr.
Atalǵan jobanyń prodıýseri, Qazaqstannyń mádenıet qaıratkeri, Qazaqstan Jýrnalıster odaǵy syılyǵynyń laýreaty Sáýle Jırenshınanyń aıtýynsha, osy ýaqytqa deıin 40-tan astam baǵdarlama efırge shyǵyp, 300-ge jýyq kórermen tikeleı efırge qońyraý shalǵan. Odan ózge qazir kórermenderden 300-ge tarta hat kelip tústi, kúnine 10-daǵan adam redaktsııaǵa habarlasýda. «Zań jáne biz» telejobasyna kásibı maman ıeleri, prokýratýra, advokat, sot, ádilet qyzmeti salasynyń bilikti mamandary qatysyp, quqyqtyq taqyrypty jan-jaqty talqylaıdy. Ár dúısenbi kúni keshki saǵat 19:00-de kórermenniń ózin mazalaǵan saýaldy stýdııa qonaqtaryna tikeleı telefon arqyly qoıýǵa nemese elektrondyq poshtasyna hat jazyp, jaýap alýǵa múmkindigi bar. «Kúndelikti turmysta ne isterin bilmeı, basy daýǵa qalyp júrgen kórermenniń hatynan, bizdiń redaktsııaǵa jazyp jatqan otandastarymyzdyń shaǵymynan túsingenimiz - bizde áli de quqyqtyq máselelerdiń kemshin tustary kóp. Neǵurlym bul taqyrypqa tereńdegen saıyn, soǵyrlym mundaı áleýmettik jobaǵa halyqtyń sýsap otyrǵanyn kórdik. Birde-bir telearna, jalpy birde-bir baspasóz quraly óz kórermeninsiz, óz oqyrmanynsyz eshteńe emes. Bizdiń basty qyzmetimiz kórermenge arnalǵan», - deıdi osy habardyń prodıýseri Sáýle Jánibekqyzy. Atalmysh baǵdarlamanyń bastamasymen uıymdastyrylyp otyrǵan «Quqyqtyq tanym aktsııasy» halyqtyń quqyqtyq saýatyn arttyrýǵa baǵyttalǵan. Esterińizge sala keteıik, ótken jyldyń qyrkúıek aıynda «Qazaqstan» ulttyq telearnasynda «Zań jáne biz» baǵdarlamasy ashylyp, onyń jýrnalısteri tikeleı efır arqyly kópshiliktiń kókeıinde júrgen quqyqtyq saýaldarǵa jaýap berip, túıtkildi máselelerdi sheshýge septigin tıgizýdi maqsat tutqan edi. Tórtinshi bıliktiń pármendiligin kórsetetin at tóbelindeı az baǵdarlamalardyń biriniń jýrnalısteri «Quqyqtyq tanym aktsııasynda» toǵyz aıda qansha máseleniń sheshimin tapqany jóninde kórermen aldynda esep bermek.
