«Qazaqstan» ulttyq arnasy «Kemel el» toptamasyn usynady
ASTANA. 8 qańtar. QazAqparat - «Qazaqstan» Ulttyq telearnasy óz kórermenderine «Kemel el» atty derekti fılmder toptamasyn usynady. Úsh bólimnen turatyn osynaý teleónim bilim jáne ǵylym, densaýlyq saqtaý, ónerkásip, ekonomıka jáne ózge de áleýmettik salalardaǵy elimizdiń jıyrma jylda jetken jetistikteri men alǵa qoıǵan maqsattary jaıynda baıandamaq.
«Qazaqstanda jasalǵan» derekti fılmi. Qańtardyń 8 juldyzy kúni Astana ýaqytymen saǵat 18.30-da. «Údemeli ındýstrıaldy-ınnovatsııalyq damý baǵdarlamasy aıasynda júzege asqan jobalar men jetistikter, otandyq ónimderdiń naryqtaǵy kólemi, jańa jumys oryndary - munyń barlyǵy da naqty tsıfrlarmen».
Fılm barysynda «Batys Eýropa - Batys Qytaı» avtomagıstraliniń salyný barysy, Qazaqstanda jasalyp jatqan avtokólikter, qaryshtap damyp kele jatqan elimizdiń ǵarysh salasy jaıynda tyń málimetter men naqty kórsetkishter mamandar aýzymen aıtylmaq.
«Eńbegin emgenniń esesi túgel» derekti fılmi. Qańtardyń 9 juldyzy, Astana ýaqytymen saǵat 18.30-da. «2020 jylǵa deıin qazaqstandyq 1 mıllıon otbasy baspanaly bolyp, taǵy mıllıondaǵan azamat turaqty jumyspen qamtylmaq. Halyqtyń áleýeti de artyp, eldegi ómir súrý deńgeıi joǵarylaıdy. Mundaı serpilis Qazaqstandy álemdegi alyp derjavalar qataryna alyp shyǵary sózsiz!»
Atalǵan fılm barysynda Elbasynyń «Qazaqstannyń áleýmettik jańǵyrtylýy: Jalpyǵa Ortaq Eńbek Qoǵamyna qaraı 20 qadam» atty maqalasyndaǵy tapsyrmalardyń oryndalý barysy baıandalady.
«Bilim - órkenıet órisi» derekti fılmi. Qańtardyń 10 juldyzy kúni Astana ýaqytymen saǵat 18.30-da. «Endi sapaly bilim alý úshin shet elge shyǵýdyń qajeti joq. Qazaqstandaǵy mektepterde jas urpaq zamanaýı ádis-tásildermen oqytylady. Al, eldegi muǵalimderdiń teń jartysy arnaıy ortalyqtarda biliktiligin arttyrmaq. Óıtkeni jarqyn bolashaq tek daryndy jastardyń qolynda!»
Derekti fılm Qazaqstandaǵy bilim jáne ǵylym salasynyń ózgeristeri, jetistikteri men aldaǵy josparlary jaıynda baıandaıdy. Sonymen qatar, Nazarbaev ýnıversıteti men zııatkerlik mektepteri, «Balapan», «100 mektep, 100 aýrýhana» baǵdarlamalary jaıynda sóz bolmaq. Oqýshylar men stýdentterge bilim berý ádisiniń qalaı ózgeretindigi týraly da atalǵan fılmnen kóre alasyzdar.
Aıta keteıik, derekti fılmder toptamasy kásibı akterlardyń qatysýymen túsirilgen.
