Qazaqstan ulttyq statıstıkany tsıfrlandyrý úshin Koreıa tájirıbesin paıdalanady
ASTANA. KAZINFORM — QR SJRA Ulttyq statıstıkasy bıýrosynyń delegatsııasy Koreıa Respýblıkasynyń Derekter jáne statıstıka mınıstrliginde (MODS) oqý saparymen júr.
Vedomstvonyń baspasóz qyzmeti málim etkendeı, is-shara Azııa damý bankiniń qoldaýymen iske asyrylyp jatqan Statıstıkany jetildirý baǵdarlamasy aıasynda uıymdastyrylǵan.
Negizgi maqsat — resmı statıstıka men derekterdi jınaý jáne taratý salasyndaǵy Ońtústik Koreıanyń ozyq tájirıbesin, sondaı-aq aqparattyq júıelerdi jetildirýge arnalǵan zamanaýı tehnologııalar men tsıfrlyq sheshimderdi zerdeleý.
Alynǵan bilim Qazaqstannyń ulttyq statıstıka júıesin odan ári jańǵyrtýda paıdalanylatyn bolady.
— Biz Koreıa Respýblıkasynyń Derekter jáne statıstıka mınıstrligimen ekijaqty yntymaqtastyqty jalǵastyrý múmkindigin joǵary baǵalaımyz. Osy is-sharaǵa shaqyrǵan koreı áriptesterine jáne qoldaý kórsetken Azııa damý bankine alǵys bildiremiz. Bul biz úshin Qazaqstannyń ulttyq statıstıkasyn tsıfrlyq transformatsııalaýdy jedeldetýge kómektesetin úzdik álemdik tájirıbelerdi úırený múmkindigi, — dedi QR SJRA Ulttyq statıstıka bıýrosy basshysynyń orynbasary Gúlmıra Qaraýylova.
Ol Qazaqstan men Koreıa Respýblıkasynyń statıstıka salasyndaǵy yntymaqtastyǵynyń kópjyldyq tarıhy bar ekenin atap ótti. Dúnıejúzilik bankpen birlesken joba aıasynda 2012-2017 jyldary koreıalyq áriptestermen tyǵyz jumys nátıjesinde Bıýro statıstıkalyq derekterdi onlaın jınaý jáne aqparattyq júıelerdi damytý boıynsha zamanaýı tásilderdi sátti engizdi.
Koreıa Respýblıkasyna jasalǵan oqý sapary Qazaqstannyń halyqaralyq standarttar men úzdik álemdik tájirıbelerge negizdelgen zamanaýı, tsıfrlyq jáne tıimdi ulttyq statıstıka júıesin damytý jónindegi júıeli jumysynyń bir bóligi bolyp tabylady.
Budan buryn Halyqaralyq uıymdar Qazaqstannyń ulttyq statıstıka júıesine joǵary baǵa bergenin jazǵanbyz.
