Qazaqstan ulttyq parkterge benzınmen júretin kólikterdiń kirýine tyıym salýy múmkin
ASTANA. KAZINFORM — Qazaqstan ulttyq parkterge benzınmen júretin kólikterdiń kirýin shekteýi múmkin. Bul másele Erevanda Qazaqstan men Armenııa ókilderiniń kezdesýinde talqylandy. Naqty sheshim ázirge qabyldanǵan joq. Bul týraly Ekologııa mınıstrligi málim etti.
Erevan qalasynda BUU-nyń Bıologııalyq ártúrlilik týraly konventsııasy Taraptarynyń 17-shi konferentsııasy (COP17) aıasynda Qazaqstan Respýblıkasynyń Ekologııa jáne tabıǵı resýrstar mınıstri Álibek Qýantyrov Armenııa Respýblıkasynyń Aýmaqtyq basqarý jáne ınfraqurylym mınıstri Davıd Hýdatıanmen kezdesti.
Kezdesý barysynda taraptar qaldyqtardy basqarý júıesin jetildirý, qaldyqtardy bólek jınaý, suryptaý jáne qaıta óńdeýdi damytý, sondaı-aq osy salada zamanaýı tehnologııalardy qoldaný múmkindikteri boıynsha yntymaqtastyq máselelerin talqylady.
Jańartylatyn energııa kózderin paıdalaný jáne elektr kóligin damytý, onyń ishinde elektr kóligin paıdalanýǵa arnalǵan ınfraqurylymdy keńeıtý perspektıvalaryna erekshe nazar aýdaryldy.
Sonymen qatar erekshe qorǵalatyn tabıǵı aýmaqtarǵa kólik quraldarynyń tıgizetin júktemesin azaıtý máseleleri qarastyryldy.
Atap aıtqanda, jekelegen tabıǵat qorǵaý aýmaqtaryna ishten janý qozǵaltqyshtary bar avtokólikterdiń kirýin shekteý jáne kelýshiler úshin ekologııalyq qaýipsiz balamaly qozǵalys tásilderin damytý múmkindikteri talqylandy.
Mundaı tásilder atmosferaǵa shyǵarylatyn lastaýshy zattardyń kólemin azaıtýǵa, tabıǵı ekojúıelerge túsetin júktemeni tómendetýge jáne turaqty ekologııalyq týrızmdi damytýǵa yqpal etýi múmkin.
Kezdesý qorytyndysy boıynsha taraptar talqylanǵan máseleler boıynsha aldaǵy ýaqytta tájirıbe almasýdy jalǵastyrýǵa múddelilik bildirdi.
Aıta keteıik, Qazaqstanda kólik sany 6 mıllıonnan asty.
