Ulttyq olımpıada komıtetiniń alǵashqy prezıdentine arnalǵan memorıaldy taqta ashyldy
ALMATY. KAZINFORM – Almatydaǵy «Dınamo» stadıonynda qazaqstandyq sporttyń kórnekti ókilderin eske alý maqsatynda memorıaldy taqtalardyń saltanatty ashylý rásimi ótti.
Estelik sharaǵa Qazaqstan Ulttyq Olımpıadalyq komıtetiniń Bas hatshysy Álimjan Aqaev, qala ákimdiginiń ókilderi, sport uıymdary, sport ardagerleri, balalar sektsııalarynyń músheleri men qoǵam qaıratkerleri qatysty.
Memorıaldyq taqtalardyń biri Qazaqstan Ulttyq Olımpıadalyq komıtetiniń tuńǵysh prezıdenti, KSRO-nyń eńbek sińirgen sport sheberi, qazirgi bessaıystan álem chempıony Tımýr Dosymbetovtiń qurmetine ashyldy.
Sonymen qatar Edýard Aırıh pen Qazbek Baıbýlovqa arnalǵan estelik taqtalar da ornatyldy.
– Biz úshin qazaqstandyq sporttyń irgetasyn qalaǵan tulǵalardy eske alý sharasyna qatysý - úlken qurmet. Olardyń esimderi men eńbegi - jańa býyn sportshylarynyń bolashaǵynyń negizi. Bul qurmettiń belgisi jas dınamoshylar men búkil sport qoǵamdastyǵy úshin shabyt kózine aınalatynyna senimdimiz, - dedi Álimjan Aqaev.
Anyqtama úshin:
Tımýr Kamaluly Dosymbetov - KSRO-nyń eńbek sińirgen sport sheberi, qazirgi bessaıystan álem chempıony. Qazaqstan Ulttyq Olımpıadalyq komıtetiniń alǵashqy prezıdenti, «Dınamo» dene shynyqtyrý-sport qoǵamynyń tóraǵa birinshi orynbasary.
Edýard Ferdınanduly Aırıh - KSRO men Qazaq KSR-iniń eńbek sińirgen jattyqtyrýshysy, Qazaqstandaǵy shaıbaly jáne shóptegi hokkeıiniń negizin qalaýshy. «Dınamo» komandasynyń bas bapkeri, bul ujym KSRO-nyń 19 dúrkin chempıony jáne Eýropa chempıondary kýbogynyń ıegeri atanǵan.
Qazbek Dáýletbekuly Baıbýlov - KSRO-nyń eńbek sińirgen jattyqtyrýshysy, KSRO-nyń sport sheberi, shóptegi hokkeı boıynsha «Dınamo» komandasynyń bas bapkeri.
Aıta keteıik, «Qazaq soldatynyń» keıipkeri Qaıyrǵalı Smaǵulov turǵan úıge eskertkish taqta ornatyldy.