Qazaqstan Ulttyq Olımpıada komıteti sport salasyna jasandy ıntellektini engizbek
ASTANA. KAZINFORM – Qazaqstan Ulttyq Olımpıadalyq komıteti jasandy ıntellektini damytý máseleleri boıynsha QazAI qaýymdastyǵymen resmı kezdesý ótkizdi.
Kezdesýge UOK bas hatshysy Álimjan Aqaev, bas dırektory Nurlan Nógerbek, QazAI qaýymdastyǵynyń tóraǵasy Temirlan Zııatov jáne tóraǵa orynbasary Anar Tóleýbaeva qatysty.
Jıyn barysynda sport salasyna zamanaýı tsıfrlyq tehnologııalar men jasandy ıntellektke negizdelgen sheshimderdi engizý máseleleri keńinen talqylandy. Taraptar bul baǵyttardyń memleket deńgeıindegi basymdyqtarǵa tolyq sáıkes keletinin atap ótti.
Aıta keteıik, Memleket basshysy Qasym-Jomart Toqaev tapsyrmasyna sáıkes, 2026 jyl Qazaqstanda Tsıfrlandyrý jáne jasandy ıntellekt jyly bolyp jarııalanǵan.
Yntymaqtastyqtyń alǵashqy praktıkalyq qadamdarynyń biri retinde QazAI qaýymdastyǵynyń sarapshylary Halyqaralyq Olımpıadalyq komıtettiń Olympic Solidarity baǵdarlamasy aıasynda júzege asyrylatyn sport menedjerlerine arnalǵan bilim berý jobalaryna qatysady.
Atap aıtqanda, 22-23 qańtar kúnderi Nazarbaev Ýnıversıtetiniń Medıtsına mektebinde sporttaǵy jasandy ıntellektini qoldaný jáne tsıfrlyq transformatsııa taqyrybyna arnalǵan dáris ótkizý josparlanyp otyr.
Sonymen qatar taraptar Qazaqstan Ulttyq Olımpıadalyq komıtetiniń qyzmetin Halyqaralyq Olımpıadalyq komıtettiń jasandy ıntellekt salasyndaǵy jahandyq kún tártibimen úılestirýge erekshe nazar aýdardy. Qazirgi tańda HOK Olımpıadalyq qozǵalystyń negizgi úderisterine jasandy ıntellektini júıeli túrde engizip keledi.
Bul baǵyttarǵa sporttyq derekterdi taldaý, basqarýshylyq sheshimderdi qoldaý, tsıfrlyq servısterdi damytý, sportshylardyń aqparattyq qaýipsizdigin qamtamasyz etý, sondaı-aq Olympic AI Agenda jahandyq strategııasy men Trustworthy AI Framework standarttary aıasynda tehnologııalardy etıkalyq ári jaýapty paıdalaný qaǵıdattaryn qalyptastyrý kiredi.
Kezdesý barysynda sporttyq uıymdardyń qyzmetin tsıfrlandyrýǵa baǵyttalǵan ishki jasandy ıntellekt ekojúıesiniń tujyrymdamasy tanystyryldy. Taraptar ıntellektýaldy medıa-muraǵat, merzimderdi avtomatty baqylaý júıeleri sekildi tsıfrlyq quraldardy ázirleý máselelerin qarastyrdy.
Sondaı-aq sportshylardyń kásibı kórsetkishteri men damý úderisin naqty ýaqyt rejıminde baqylaýǵa, olardyń mansaptaǵy árbir kezeńine keshendi taldaý júrgizýge múmkindik beretin baǵdarlamalyq ónimder men biryńǵaı tsıfrlyq profıl qurý máselesi negizgi basymdyq retinde ataldy.
«Búginde Halyqaralyq Olımpıadalyq komıtet jasandy ıntellektini basqarý tıimdiligin arttyrý men sportshylardy qoldaýdyń mańyzdy quraldarynyń biri retinde qarastyryp otyr. Biz úshin bastamalarymyzdy HOK tásilderimen úılestirip, sportshylar men sport uıymdarynyń múddesine qyzmet etetin tsıfrlyq júıe qalyptastyrý asa mańyzdy», – dedi Álimjan Aqaev.
Kezdesý qorytyndysy boıynsha taraptar tsıfrlyq bastamalardy birlesip damytýǵa kelisti. Sonymen qatar ortaq jobalardy júzege asyrýdyń aldaǵy qadamdary aıqyndaldy.
Aıta keteıik, Jasandy ıntellekt týraly zań kúshine endi.