Kim? Qaıda? Qandaı? — «Eren eńbegi úshin» medalimen marapattalǵan úsh fýtbolshy jaıly
Respýblıka kúnine oraı Memleket basshysynyń Jarlyǵymen fýtboldan Qazaqstan ulttyq quramasynyń oıynshylary Ashat Taǵybergen, Bahtıer Zaınýtdınov jáne Maksım Samorodov «Eren eńbegi úshin» medalimen marapattaldy, dep habarlaıdy Kazinform.
2023 jylǵy álemniń eń úzdik golynyń avtory ataǵyna úmitker
Qazaqstan ulttyq quramasynyń jáne shymkenttik «Ordabasy» klýbynyń kapıtany Ashat Taǵybergen 1990 jyly 9 tamyzda dúnıege kelgen.
A. Taǵybergen sporttyq jolyn 2008 jyly Qyzylordanyń «Qaısar» klýbynda bastady. 2013 jyly «Aqtóbe» komandasyna aýysyp, el chempıony, kúmis jáne qola júldeger atandy. Qazaqstan sýperkýbogin jeńip aldy. Eýropa lıgasy men ÝEFA chempıondar lıgasynyń irikteý kezeńderine qatysty.
2016 jyldan «Astana» sapynda dop teýip, eki jyl qatarynan Qazaqstan chempıony atandy. El kýbogine de qol jetkizdi.
Qostanaıdyń «Tobyly» quramynda 2021 jyly jáne bıyl shymkenttik «Ordabasy» sapynda respýblıka chempıony boldy.
Qazaqstan quramasyna 2014 jyly alǵash ret shaqyrylǵan Ashat Taǵybergen bıyl Astanada 2024 jylǵy Eýropa chempıonatynyń irikteý týrnırinde Danııa quramasynyń qaqpasyna alystan qaqyrata gol soqty. Osy gol Ferents Pýshkash atyndaǵy Halyqaralyq fýtbol federatsııasy (FIFA) syılyǵynyń «Jyldyń úzdik goly» nomınatsııasyna endi.
Qazaqstan ulttyq quramasy tarıhynda úzdik surmergen
Bahtıer Zaınýtdınov 1998 jyly 2 sáýirde Taraz qalasynda ómir esigin ashty. Ol 19 jasynda-aq «Taraz» klýbynda oınap, birden jarq etip, kózge tústi.
2017 jyly 25 qarashada «Astanaǵa» aýysyp, sýperkýbokti jeńip aldy. Bir jyldan keıin el chempıony ataǵyna qol jetkizdi.
2019 jyly 12 qańtarda reseılik «Rostov» klýbymen kelisim-shart jasasty.
2020 jyldyń 25 tamyzynan Máskeýdiń TsSKA komandasynda oınady. Bıylǵy tamyzdan beri Túrkııanyń «Beshıktash» klýby quramynda alańǵa shyǵyp keledi.
Qazaqstan ulttyq quramasyna alǵash 2018 jyly alyndy. Bıyl 17 qazanda Fınlıandııamen ótken matchta qos goldyń avtory atandy. Sóıtip komanda sapynda 14 gol soǵyp, Rýslan Baltıevti (13) basyp ozyp, Qazaqstan ulttyq quramasy tarıhynda úzdik surmergen atandy.
Samorodov - sary altyn samorodok
Maksım Samorodov 2002 jyly 29 maýsymda Aqtóbe qalasynda týǵan.
«Aqtóbe» sapynda 2019 jyly 5 qazanda «Qaıratpen» (Almaty) ótken kezdesýde alǵash ret alańǵa shyqty. 2021 jyly 2 shildede «Aqjaıyq» qaqpasyna qos dop engizip, komandasyna jeńis áperdi. 2022 jylǵy Qazaqstan chempıonatynyń kúmis júldegeri.
Qazaqstan quramasyna 2021 jyly 17 naýryzda sol kezdegi bas bapker Talǵat Baısýfınovtan shaqyrtý aldy. 28 naýryzda 2022 jylǵy álem chempıonatynyń irikteý týrnırinde Frantsııamen ótken oıynda (0:2) 83-mınýtta Rýslan Valıýllınniń ornyna shyqty.
M. Samorodov 2024 jylǵy Eýropa chempıonatynyń irikteý satysynda Qazaqstan quramasy negizgi shabýylshylarynyń birine aınalyp úlgerdi.
