Qazaqstan ulttyq quramasy Belgııaǵa bardy

ASTANA. KAZINFORM — Búgin keshke Brıýssel qalasynyń áýejaıyna Qazaqstan Respýblıkasy fýtbol quramasy mingen ushaq kelip qondy, dep habarlaıdy Kazinform menshikti tilshisi.

7 qyrkúıek kúni jergilikti «Anderleht» stadıonynda qazaqstandyqtar 2026 jylǵy fýtboldan álem chempıonatynyń irikteý kezeńi aıasynda Belgııa quramasyna qarsy oıyn ótkizedi.

Áýejaıda Qazaqstan fýtbol quramasyn osy eldiń joǵary oqý oryndarynda bilim alyp jatqan bir top qazaqstandyq stýdent qarsy aldy. Jastar «Zaventem» áýejaıyna ulttyq rámizdermen: týlarmen, qurama jeıdelerimen, sondaı-aq ulttyq kıimmen keldi.

Óz kezeginde, fýtbolshylar da ushyp kelgennen keıin óz otandastaryn jyly qarsy alyp, estelik sýretke túsip, jankúıerlerge qoldaý kórsetkenderi úshin alǵys aıtty. Jankúıerler oıyn kezinde stadıonda qyzý qoldaý kórsetetinderin aıtyp, sportshylarǵa sáttilik tiledi.

Qazaqstandyq oıynshylar Ýels quramasynan jýyrda jeńilip qalǵanyna qaramastan, tek jeńiske jáne joǵary nátıjege umtylatyndaryn jetkizdi.

Eske sala keteıik, bul match aldynda Qazaqstan quramasynyń qorjynynda tórt oıynnan keıin úsh upaı bar, al Belgııa quramasy úsh oıynnan keıin jeti upaı jınaǵan.

Oıyn Brıýssel ýaqyty boıynsha saǵat 21:00–de bastalady. Kezdesýdi rýmynııalyq tóreshiler toby basqarady. Bas tóreshi — Radý Petreský, oǵan assıstentter retinde Radý Gıngýlıak pen Mırcha Grıgorıý kómektesedi.

Budan buryn habarlanǵandaı, keshe Qazaqstan quramasy Ýelske ese jiberdi.

Keıinnen Qazaqstan quramasynyń bas bapkeri Ýelsten jeńilý sebebin túsindirdi.