Qazaqstan ulttyq quramasy alǵash ret tolyq sporttyq kıim jıyntyǵymen qamtylyp jatyr
ASTANA. KAZINFORM – Qazaqstan Týrızm jáne sport mınıstrligi ulttyq quramany sport kıimmen qamtamasyz etýdiń jańartylǵan tásili iske asyrylyp jatqanyn habarlady.
Bıyl sportshylardy kıimmen qamtamasyz etý sport maýsymy boıyndaǵy barlyq qajettilikti tolyq qamtıtyn jańartylǵan tásilder negizinde júzege asyrylyp jatyr. Atap aıtqanda, jarysqa arnalǵan formamen qatar, sportshylarǵa jattyǵý úderisi men jarysqa daıyndyqqa qajetti kıimder de beriledi.
Buǵan deıin qamtamasyz etý ishinara sıpatta bolǵan. Mysaly, jazǵy sport túrleri tek jazǵy kıimmen ǵana qamtylatyn. Al bıyl árbir sportshyǵa qysqy jáne jazǵy jıyntyqty qamtıtyn tolyq kıim kesheni usynyldy.
Ekıpırovka halyqaralyq Under Armour brendimen jasalǵan kelisim aıasynda jetkizilip jatyr. Jıyntyq quramyna sporttyq kıimniń negizgi elementterin qamtıtyn 18 túrli ataý kiredi. Atap aıtqanda, úsh aıaq kıim, tórt sporttyq kostıým, úsh jeıde, qystyq syrtqy kıim, keýdeshe jáne taǵy basqa sportshyǵa eń qajetti kıimder bar.
– Memleketimizdiń úlken qoldaýynyń arqasynda sportshylarǵa álemdik brendtiń sapaly sport kıimderi berilip jatyr. Bul biz úshin úlken qýanysh ári maqtanysh. Buryn jazǵy sport túrlerine tek jazdyq, al qysqy sport túrlerine tek qystyq kıim ǵana beriletin. Qazirgi tańda sport túrlerine bólmeı, barlyǵymyzǵa birdeı jazdyq ta, qystyq ta kıimder usynylyp jatyr. Bul bastama, bir jaǵynan, bizdi biriktirip, ortaq rýh qalyptastyrýǵa yqpal etedi. Endi Qazaqstannyń barlyq sportshysy biryńǵaı formada óner kórsetip, el namysyn abyroımen qorǵaýǵa tyrysady, - deıdi dzıýdodan Parıj Olımpıadasynyń qola júldegeri Ǵusman Qyrǵyzbaev.
Qazirgi tańda forma jeńil atletıka, boks, dzıýdo, semserlesý, short-trek jáne ózge de sport túrleri boıynsha ulttyq quramalardyń birqataryna tabystaldy.
Ekıpırovka bıýdjetten tys qarajat esebinen satyp alyndy.
Atalǵan tásildi engizý ulttyq quramalar sportshylaryna daıyndyq úshin teń ári sapaly jaǵdaı jasaýǵa jáne olardyń halyqaralyq arenadaǵy nátıjeliligin arttyrýǵa baǵyttalǵan.
Aıta keteıik, qazaqtyń ulttyq kıiminiń baǵasy elimizdiń óńirlerinde ártúrli. Bazarda satylatyn kıim birinde arzan, al ekinshisinde qymbat bolyp tur. Onyń ishinde eksklıýzıvti kıimniń quny joǵary.
