Qazaqstan Ulttyq krıptorezervke 700 mln dollarǵa deıin ınvestıtsııa salady

ASTANA. KAZINFORM — Memleket basshysynyń tapsyrmasy boıynsha byltyr Qazaqstanda Ulttyq strategııalyq krıptorezerv quryldy. Onyń jalpy kólemi 700 mln AQSh dollaryna jetýi múmkin. Bul týraly Kazinform agenttigine QR Ulttyq bankinen jaýap berdi.

— Krıptorezerv Ulttyq banktiń altyn-valıýta aktıvteriniń (350 mln dollarǵa deıin), Ulttyq qor aktıvteriniń (350 mln dollarǵa deıin) bir bóligin, sondaı-aq QR Úkimetiniń sheshimi boıynsha basqa da memlekettik aktıvterdi (memleket paıdasyna tárkilengen krıptoaktıvterdi qosa alǵanda) ınvestıtsııalaý arqyly qalyptastyrylady. Krıptorezervti qalyptastyrýǵa bıýdjetten qarajat bólý josparda joq, - delingen UB jaýabynda.

Krıptorezervti QR UB-nyń Ulttyq ınvestıtsııalyq korporatsııasy basqarady, al tsıfrlyq aktıvterdi esepke alý men saqtaýdy «Baǵaly qaǵazdar ortalyq depozıtarııi» AQ qamtamasyz etedi.

Krıptorezervtiń aktıvterin tsıfrlyq aktıvterge, qarjy tetikterine, sondaı-aq tsıfrlyq aktıvterdi damytatyn kompanııalardyń aktsııalary men úlesterine ınvestıtsııalaý josparlanǵan.

Qazirgi kezde Ulttyq bank halyqaralyq tájirıbeni eskere otyryp, tıisti ınfraqurylymdy daıyndap jatyr jáne krıptorezervtiń qyzmeti men basqarý mehanızmin retteıtin qujattardy qabyldaý sharalary júrip jatyr.

Krıptorezervterdi basqarý nátıjeleri týraly jyldyq esep Qazaqstan Respýblıkasy Ulttyq qoryn basqarý jónindegi keńeske usynylady.

Eske salsaq, Memleket basshysy Qasym-Jomart Toqaevtyń bıylǵy Joldaýynda Ulttyq Banktiń bazasynda Memlekettik tsıfrlyq aktıvter qoryn (krıptorezerv) qurý jóninde tapsyrma berilgen bolatyn.

Byltyr qyrkúıek aıynda Ulttyq bank krıptorezerv tujyrymdamasyn ázirlep jatqany málim boldy.