Qazaqstan Ulttyq qordan tolyq bas tartpaıdy – Qarjy mınıstrligi
ASTANA. KAZINFORM – Qazaqstan Ulttyq qordan bólinetin transfertterden tolyq bas tartýdy ázirge josparlap otyrǵan joq. Bul týraly Májilis kýlýarynda Qazaqstan Respýblıkasynyń Qarjy vıtse-mınıstri Erjan Birjanov málim etti.
Onyń aıtýynsha, bıyl respýblıkalyq bıýdjet kirisi aıtarlyqtaı ósken. Atap aıtqanda, birinshi toqsan qorytyndysy boıynsha túsimder ótken jyldyń sáıkes kezeńimen salystyrǵanda 131,6 paıyz boldy.
- Ótken jyly osy kezeńde respýblıkalyq bıýdjetke shamamen 3,1 trln teńge tússe, bıyl bul kórsetkish 4,076 trln teńgege jetti. ıAǵnı shamamen 1 trln teńgege artyq, – dedi vıtse-mınıstr.
Sonymen qatar ol bul ósim ótken jylmen salystyrmaly kórsetkish ekenin, al jalpy alǵanda bıýdjet jospary tolyq oryndalǵanyn atap ótti.
- Qazirgi jyly josparlar aýqymdy. Sondyqtan qandaı da bir qaıta bólý nemese mehanızmderdi ózgertý máselesi qaralyp jatqan joq. Ózderińiz bilesizder, bıyl biz nysanaly transfertterden bas tarttyq. Qazir tek Ulttyq qordan kepildendirilgen transfert saqtaldy, – dedi ol.
Vıtse-mınıstrdiń sózinshe, aldaǵy ýaqytta salyq bazasy nyǵaıǵan jaǵdaıda Ulttyq qorǵa táýeldilikti birtindep azaıtý múmkindigi qarastyrylady.
- Bizde bıýdjet tapshylyǵy bar. Sol tapshylyqty jabý úshin túrli qarjylandyrý kózderi paıdalanylady, – dep túıindedi Erjar Birjanov.
Buǵan deıin Ulttyq ekonomıka mınıstrligindegiler Taıaý Shyǵystaǵy ahýalǵa baılanysty munaı baǵasynyń qymbattaýy Ulttyq qordan bıýdjetke alynatyn transfert kólemine qalaı áser etetinin aıtqan edi.
