Qazaqstan Ulttyq banki otandyq reıtıng agenttiginiń quryltaıshysy bolady
ASTANA. KAZINFORM — Prezıdent «Kredıttik reıtıngtik qyzmet týraly» zańǵa qol qoıdy. Qujat Qazaqstandaǵy reıtıng agenttikteriniń jumysyna biryńǵaı talaptar engizedi.
Bul eldiń qarjy naryǵyna qandaı ózgeris ákeledi?
Qazaqstanda kredıttik reıtıngterdi zańǵa sáıkes tirkelgen jáne tanylǵan kredıttik reıtıng agenttikteri ǵana bere alady. Olar qazaqstandyq, halyqaralyq jáne sheteldik agenttikter bolyp naqty jikteledi.
Negizgi jańashyldyqtyń biri – qazaqstandyq reıtıng agenttigin qurý. Onyń quryltaıshylarynyń biri Qazaqstan Ulttyq banki bolady. Zańda bul agenttiktiń kapıtalyna, korporatıvtik basqarýyna, ishki baqylaýyna jáne múddeler qaqtyǵysyn retteýge qatysty jeke talaptar belgilenedi.
Agenttikter tek kredıttik reıtıngter ǵana emes, reıtıngtiń ózge de túrlerin bere alady. Zańda korporatıvtik basqarý, ıslamdyq qarjylandyrý qaǵıdattaryna sáıkestik, egemen kredıttik, ornyqty damý jáne basqa da reıtıng túrlerin berý múmkindigi qarastyrylǵan.
Bul rette baǵalaý ádistemeleri ashyq ári negizdi bolýy tıis. Reıtıng berýge negiz bolatyn aqparat sapaly ári senimdi bolýy qajet. Sondaı-aq agenttikter zańda kózdelgen aqparatty ashýǵa jáne óz qyzmetiniń táýelsizdigin qamtamasyz etýge mindetti.
Jańa agenttik basshylyǵyna qandaı talap qoıylady?
Qazaqstandyq reıtıng agenttiginiń basshy qyzmetkerlerine jeke talaptar belgilengen. Basshylyq laýazymdarǵa joǵary ekonomıkalyq, zańgerlik, matematıkalyq nemese tehnıkalyq bilimi jáne qajetti kásibı eńbek ótili bar adamdar taǵaıyndala alady.
Sonymen qatar basshylardyń minsiz iskerlik bedeli bolýy shart. Atap aıtqanda, sybaılas jemqorlyq quqyq buzýshylyq jasaǵan adamdarǵa shekteý qoıylady. Sondaı-aq buǵan deıin qarjy uıymynda basshylyq laýazymdy atqarýǵa berilgen kelisimi keri qaıtarylǵan nemese sol laýazymnan shettetilgen adamdarǵa da shekteýler qarastyrylǵan.
Úmitkerlerdiń belgilengen talaptarǵa sáıkestigin qazaqstandyq reıtıng agenttiginiń ózi tekseredi.
Jalpy zań kredıttik reıtıngter naryǵynyń jumys tártibin retteıdi. Onda reıtıngti kim bere alatyny, baǵalaý qandaı qaǵıdattar boıynsha júrgiziletini jáne agenttikter men olardyń basshylyǵyna qandaı talaptar qoıylatyny belgilengen.
Bul reıtıngtik qyzmettiń ashyqtyǵyn arttyryp, reıtıngti paıdalanýshylardy negizsiz nemese múddeler qaqtyǵysyna baılanysty berilgen baǵalaýlardan qorǵaýǵa múmkindik beredi dep kútiledi.
Zań 2026 jylǵy 21 qazannan bastap qoldanysqa engiziledi. Al onyń jekelegen normalary 2027 jylǵy 1 shildeden bastap kúshine enedi.
Buǵan deıin qazaqstandyqtarǵa aıyppulsyz kredıtten bas tartýǵa 14 kún beriletini habarlanǵan edi.
