Qazaqstan Ulttyq banki 2026 jylǵy Olımpıada oıyndarynyń qurmetine kollektsııalyq moneta shyǵarady
ASTANA. KAZINFORM - Qazaqstan Respýblıkasynyń Ulttyq banki «Sport» serııasynan «OLYMPIC GAMES 2026. SHORT TRACK» atty kollektsııalyq monetalaryn aınalysqa shyǵarǵanyn jarııalady, dep habarlaıdy olympic.kz.
1000 teńge nomınaly bar moneta 925 synamaly kúmisten jasalǵan, tústi basyp shyǵarý tehnologııasy qoldanylǵan jáne proof sapasynda oryndalǵan. Monetanyń massasy - 20 gramm, dıametri - 37 mm. Jalpy daıyndaý taralymy shekteýli - 2000 dana.
Kollektsııalyq monetalar Qazaqstan teńge saraıynda daıyndalyp, nemistiń MDM Münzhandelsgesellschaft mbH & Co. KG Deutsche Münze (MDM) nýmızmatıka kompanııasymen seriktestik negizde ázirlendi.
Monetalardy qashan satýǵa shyǵarylatyny týraly aqparat Ulttyq banktiń resmı saıtynda qosymsha habarlanady.
Sonymen qatar kollektsııalyq monetalar Qazaqstan Respýblıkasynyń búkil aýmaǵynda óziniń belgilengen qunymen tólemderdiń barlyq túri boıynsha qabyldanýǵa, sondaı-aq eldiń barlyq bankinde bank shottaryna esepke alýǵa jáne aýdarýǵa, usaqtaýǵa jáne aıyrbastaýǵa jatady.
Osyǵan deıin Mılan qysqy Olımpıada oıyndarynyń alaýy jaǵylǵany týraly jazdyq.