Qazaqstan Ulybrıtanııa kompanııalary men qarjy ınstıtýttaryn ekologııalyq jobalarǵa tartpaq
ASTANA. KAZINFORM- Qazaqstan men Ulybrıtanııa energetıkalyq aýysý, klımattyq qarjylandyrý jáne kómirtegi naryǵyn damytý salalaryndaǵy jobalarǵa brıtandyq kompanııalar men qarjy ınstıtýttaryn tartý perspektıvalaryn talqylady.
Bul týraly Qazaqstan Respýblıkasynyń Ekologııa jáne tabıǵı resýrstar mınıstri Á. S. Qýantyrov pen Birikken Koroldiktiń Parlamenti Lordtar palatasynyń múshesi, Birikken Koroldiktiń Ázirbaıjan jáne Ortalyq Azııa boıynsha saýda ókili Lord Djon Tomas Alderdaıs arasyndaǵy kezdesýde aıtyldy.
Taraptar qorshaǵan ortany qorǵaý, klımattyń ózgerýi jáne bıologııalyq ártúrlilikti saqtaý salasyndaǵy yntymaqtastyqtyń ózekti máseleleri týraly pikir almasty.
Klımattyń ózgerýine beıimdelý, sý resýrstaryn basqarý, aýyl sharýashylyǵynyń turaqtylyǵy jáne ekstremaldy aýa raıynyń áserin azaıtý máselelerine erekshe nazar aýdaryldy. Qazaqstan klımattyq dıplomatııa, klımattyq qarjylandyrý jáne klımattyq táýekelderdi basqarý salasyndaǵy brıtandyq tájirıbemen almasýǵa qyzyǵýshylyq bildirdi.
Energetıkalyq aýysý, klımattyq qarjylandyrý jáne kómirtegi naryǵyn damytý salasyndaǵy jobalardy iske asyrýǵa brıtandyq kompanııalar men qarjy ınstıtýttaryn tartý perspektıvalary jeke qaraldy.
Qazaqstan sondaı-aq Parıj kelisiminiń 6-babyn iske asyrý jáne kómirtegi birlikterin verıfıkatsııalaý máseleleri boıynsha yntymaqtastyqqa múddeli.
Taraptar Qazaqstannyń tozǵan jerlerdi qalpyna keltirýge, qorǵanysh orman ekpelerin qurýǵa jáne shóleıttený, qurǵaqshylyq pen transshekaralyq shań daýyldarynyń saldaryn azaıtýǵa baǵyttalǵan «Ortalyq Azııanyń Jasyl qalqany» bastamasyn talqylady.
Qaıta óńdeýdiń zamanaýı tehnologııalaryn engizý jáne jeke ınvestıtsııalardy tartýdy qosa alǵanda, tsırkýlıarlyq ekonomıka men qaldyqtarmen jumys isteý salasyndaǵy yntymaqtastyq perspektıvalyq baǵyt retinde aıqyndaldy.
Kezdesý sońynda qazaqstandyq tarap brıtandyq uıymdarmen, ınvestorlarmen jáne qarjy ınstıtýttarymen praktıkalyq ózara is-qımyldy odan ári keńeıtýge múddeliligin atap ótti.
Bıoalýantúrlilikti saqtaý salasyndaǵy, atap aıtqanda «Altyn Dala» jobasy aıasyndaǵy yntymaqtastyqtyń oń tájirıbesi atap ótildi.
Kezdesý sońynda taraptar Astana qalasynda aǵymdaǵy jyldyń qazan aıyna josparlanǵan aldaǵy Qazaqstan-Brıtan komıssııasynyń jumysy týraly máseleni talqylady.
Osyǵan deıin Quryltaıǵa Ulybrıtanııa parlamentiniń alǵashqy sheteldik delegatsııasy kelgeni týraly jazdyq.
