Qazaqstan UQShU-ǵa tóraǵalyq etedi

ASTANA. QazAqparat - Ujymdyq qaýipsizdik týraly shart uıymy (UQShU) Ujymdyq qaýipsizdik keńesiniń 30 qarashada Mınskide ótetin sessııasy kezinde osy uıymǵa tóraǵalyq Qazaqstanǵa kóshetin bolady. Bul týraly «QazAqparatqa» Syrtqy ister mınıstrligi Halyqaralyq aqparat komıtetiniń Tóraǵasy Talǵat Jumaǵulov málimdedi.

Memleket basshysy Nursultan Nazarbaev óz sózinde aldaǵy jylda UQShU-ǵa qazaqstandyq tóraǵalyqtyń basymdyqtaryn usynyp, bul uıymdy odan ári damytý boıynsha Astananyń kózqarasyn anyqtap beredi dep kútilýde, dep túsindirdi Syrtqy ister mınıstrligi.

Bıyl Ujymdyq qaýipsizdik týraly shartqa qol qoıylǵanyna 25 jyl jáne uıymnyń qurylǵanyna 15 jyl tolyp otyr. Sammıt barysynda UQShU-ǵa múshe memleketter sońǵy kezeń ishinde Uıymnyń jumysyn qorytyndylap, qysqa merzimdi jospar anyqtap, álemdegi jáne UQShU-nyń jaýapkershiligi aımaǵyndaǵy qazirgi jaǵdaıdy talqylaıdy.

«Ujymdyq qaýipsizdik týraly shart uıymy aıasyndaǵy yntymaqtastyq Qazaqstan Respýblıkasynyń mańyzdy syrtqy saıası basymdyqtarynyń biri bolyp tabylady. Qazaqstannyń UQShU-daǵy ustanymy halyqaralyq quqyqty qatań saqtaı otyryp, halyqaralyq jáne óńirlik turaqtylyqty qamatamasyz etý, jańa qaýip-qaterlerge tótetep berý, olardy aldyn-ala eskertý jáne boldyrmaý mindetterin sheshý qajettiligine negizdeledi», - dedi T. Jumaǵulov.

Budan buryn Syrtqy ister mınıstrligi Nursultan Nazarbaevtyń Mınskige saparynyń kún tártibi men onyń Prezıdent Aleksandr Lýkashenkomen kezdesýi týraly túsinik berdi.