Qazaqstan UQShU aıasyndaǵy yntymaqtastyqqa qatysty usynystaryn aıtty
ASTANA. KAZINFORM — Ujymdyq qaýipsizdik týraly shart uıymy qaýipsizdik keńesteri hatshylarynyń kezekti otyrysy ótti, dep habarlaıdy Aqordanyń baspasóz qyzmeti.
Qazaqstan Respýblıkasy Qaýipsizdik Keńesiniń hatshysy Ǵızat Nurdáýletov Máskeýde ótken Ujymdyq qaýipsizdik týraly shart uıymy qaýipsizdik keńesteri hatshylarynyń kezekti otyrysyna qatysty.
Іs-shara barysynda qaýipsizdik keńesteri hatshylary UQShU jaýapkershilik aımaǵyndaǵy jaǵdaıǵa jáne onyń Uıymǵa múshe memleketterdiń qaýipsizdigine qatysty pikir almasty.
— Ǵ.Nurdáýletov Qazaqstannyń UQShU formatyndaǵy yntymaqtastyq máselelerine qatysty ustanymdaryn baıandap, Uıymdy odan ári damytýǵa baǵyttalǵan birqatar usynysyn jetkizdi. Budan bólek, aqparattyq qaýipsizdik, esirtki aınalymy, zańsyz kóshi-qon jáne halyqaralyq terrorızm syn-qaterlerine qarsy is-qımyl jónindegi praktıkalyq sharalarǵa aıryqsha nazar aýdaryldy, — delingen habarlamada.
UQShU sheńberinde ózara is-qımyl tetikterin odan ári jetildirýge jáne ujymdyq qaýipsizdikti qamtamasyz etý salasyndaǵy úılestirýdi nyǵaıtýǵa baǵyttalǵan birqatar qujatqa qol qoıyldy.
Qaýipsizdik keńesteri hatshylarynyń kezekti otyrysy Reseı Federatsııasynyń UQShU-ǵa tóraǵalyq etýi eskerile otyryp, 2026 jylǵy 10 qarashada Máskeýde UQShU Ujymdyq qaýipsizdik keńesiniń sessııasy qarsańynda ótedi.
Buǵan deıin Erlan Qoshanov UQShU alańynda Qazaqstannyń jańa Konstıtýtsııasyn tanystyrǵanyn jazdyq.
