Qazaqstan UQShU aıasynda tsıfrlyq bastamalaryn tanystyrdy
ASTANA. KAZINFORM — Qazaqstan Respýblıkasynyń Syrtqy ister mınıstri Ermek Kósherbaev Ujymdyq qaýipsizdik týraly shart uıymy (UQShU) Syrtqy ister mınıstrleri keńesiniń kezekti otyrysyna qatysty.
Kezdesý barysynda Ujymdyq qaýipsizdik týraly shart uıymyna (UQShU) múshe memleketterdiń syrtqy saıası vedomstvolarynyń basshylary halyqaralyq jáne óńirlik ahýal, sondaı-aq onyń Uıymǵa múshe memleketterdiń qaýipsizdigine áseri jóninde pikir almasty.
Qazaqstan Syrtqy ister mınıstri óz sózinde Ujymdyq qaýipsizdik týraly shart uıymy (UQShU) óńirdegi beıbitshilikti, turaqtylyqty jáne ornyqty damýdy qamtamasyz etýdiń mańyzdy tetigi ekenin atap ótti. Uıymǵa múshe memleketter birlesken kúsh-jigerdiń arqasynda zamanaýı syn-qaterler men qaýipterge tıimdi qarsy turyp, qorǵanys salasyndaǵy is-qımyldaryn úılestirip, daǵdarystyq jaǵdaılarǵa jedel den qoıýda.
Sondaı-aq mınıstr UQShU formatyndaǵy yntymaqtastyq máseleleri boıynsha Qazaqstannyń ustanymy men tásilderi týraly habardar etip, Uıymdy odan ári jan-jaqty damytýǵa baǵyttalǵan birqatar usynystaryn ortaǵa saldy.
— Aqparattyq jáne kıberqaýipsizdikti qamtamasyz etý máseleleri boıynsha kúsh-jigerdi úılestirýdiń mańyzdylyǵyn atap ótti. Osy turǵyda qatysýshylardy Qazaqstandaǵy tsıfrlyq tehnologııalar men jasandy ıntellekt salasynyń damýymen tanystyrdy. Atap aıtqanda, Tsıfrlyq kodekstiń qabyldanýy, «Alem AI» jasandy ıntellekt ortalyǵynyń jáne sýperkompıýterlik klasterdiń iske qosylýy, sondaı-aq «Derekterdi óńdeý ortalyqtarynyń alqabyn» qurý jáne «Astana Smart City» jobasyn júzege asyrý jóninde aqparat berdi, — delingen habarlamada.
Sondaı-aq Almaty qalasynda Turaqty damý maqsattary boıynsha tsıfrlyq sheshimderdiń Azııa-Tynyq muhıty óńirlik ortalyǵyn qurý bastamasyn qoldaǵany úshin UQShU-daǵy seriktesterge alǵysyn bildirdi.
Otyrys qorytyndysy boıynsha mınıstrler UQShU-nyń 2030 jylǵa deıingi Terrorızmge qarsy strategııasynyń jobasyn maquldady.
Syrtqy ister mınıstrleri keńesi ǵarysh keńistiginde qarýlaný jarysynyń aldyn alý, aqparattyq-kommýnıkatsııalyq tehnologııalardy dıversııalyq jáne terrorıstik maqsattarda paıdalaný qaterlerine qarsy is-qımyl jasaý qajettiligi, halyqaralyq quqyqtyń rólin nyǵaıtý jáne BUU Jarǵysynyń qaǵıdattaryna beıildilik, sondaı-aq Uly Otan soǵysynyń bastalǵanyna 85 jyl tolýyna baılanysty saıası málimdemeler qabyldady.
Jalpy alǵanda, taraptar UQShU aıasyndaǵy ózara is-qımyldy damytýǵa jáne Uıymdy odan ári nyǵaıtýǵa beıildi ekendikterin rastady.
Reseı Federatsııasynyń tóraǵalyǵyn eskere otyryp, Syrtqy ister mınıstrleri keńesiniń kelesi otyrysy 2026 jylǵy qarashada Máskeý qalasynda UQShU Ujymdyq qaýipsizdik keńesiniń sessııasy qarsańynda ótedi.
Buǵan deıin Erlan Qoshanov UQShU alańynda Qazaqstannyń jańa Konstıtýtsııasyn tanystyrǵanyn jazdyq.
