Qazaqstan Ýkraınadaǵy qaqtyǵysty retteý boıynsha kelissózdiń jandanýyna qoldaý bildiredi
AShHABAD. KAZINFORM — Prezıdent BUU-ǵa múshe memleketterdiń aýqymdy dıalogty bastaýy, iri derjavalardyń saıası erik-jiger kórsetýi óte mańyzdy dep sanaıdy. Bul týraly Aqordanyń baspasóz qyzmeti habarlady.
Memleket basshysy elimiz Túrikmenstan Prezıdentiniń BUU beıbitshilik jáne beıtaraptyq ýnıversıtetin ashý jónindegi búgingi usynysyn qoldaıtynyn aıtty.
— Qazirdiń ózinde jahan jik-jikke bólinýden, tipti ıadrolyq soǵystan bas tartyp, beıbitshilik, senim, yntymaq sekildi qundylyqtardy basshylyqqa alǵan kezde álemde ádiletti jáne ornyqty tártip ornatýǵa bolatyny belgili boldy. Osy oraıda elimiz Ýkraınadaǵy qaqtyǵysty retteý boıynsha kelissóz protsesiniń jandanýyna qoldaý bildiredi. Reseı men AQSh prezıdentteriniń Ankorıdjdegi kezdesýinen keıin beıbitshilik paktisiniń negizgi erejeleri belsendi talqylana bastady. Bul kópten kútken bitimge kelý múmkindigin jaqyndatty, — dedi Prezıdent.
Osyǵan deıin Memleket basshysy BUU minberinde Ýkraına aınalasyndaǵy daǵdarysty sheshýdiń basty qaǵıdatyn atady.
Aıta keteıik, Prezıdent Túrikmenstannyń turaqty beıtaraptyǵynyń 30 jyldyǵyna arnalǵan forýmǵa qatysyp jatyr.