Qazaqstan Ýkraınada bolyp jatqan oqıǵadan syrt qala almaıdy - QR SІM

ASTANA. QazAqparat - Qazaqstan Respýblıkasy Ýkraındaǵy ahýaldy retteý boıynsha Mınsk alańynyń mańyzdylyǵyna kúmán keltirmeıdi. Bul týraly búgin Astanada ótken baspasóz máslıhatynda QR Syrtqy ister vıtse-mınıstri Erjan Ashyqbaev málim etti, dep habarlaıdy «QazAqparat» HAA tilshisi.

«Jalpy aıtarym, Qazaqstan Ýkraınadaǵy ahýaldy retteý boıynsha árqashan da Mınsk kelisimin qoldaıdy. Vashıngtonda joǵary dárejede ótken kelissózder barysynda Mınsk kelisimin júzege asyrýdyń mańyzdylyǵy týrasynda másele kóterilgen bolatyn. Biz bul máseleni árqashan beıbit jolmen sheshýden basqa jol joq degen ustanymdamyz. Qazaqstan Respýblıkasy Mınsk alańynyń mańyzdylyǵyna kúmán keltirmeıdi. Ózderińiz biletindeı, Memleket basshysy osy alańnyń qurylýyna kúsh salǵan «sáýletshilerdiń» biri bolǵan edi. Sonymen qatar, biz Mınsk kelisimin júzege asyrýda halyqaralyq qoldaý bildirýge daıyn ekenimizdi árqashan atap ótip otyramyz. Jalpy, Mınsk - senimdi alań retinde tanyta bildi», - deıdi Erjan Ashyqbaev.

QR Syrtqy ister vıtse-mınıstri Ýkraınadaǵy másele boıynsha talqy alańynyń ótý orynyna baılanysty Qazaqstan tarapynan eshqandaı másele týyndap otyrmaǵanyn atap ótti.

«Ýkraınanyń shyǵysyndaǵy ahýalǵa kelsek, Qazaqstan bolyp jatqan oqıǵadan syrt qala almaıtynyn atap ótkim keledi. Biz úshin Ýkraına saıası, ekonomıkalyq jáne mádenı salada qarym-qatynasty damytyp kele jatqan memleket», - deıdi Erjan Ashyqbaev.

Eske sala ketsek, Nursultan Nazarbaev AQSh-qa saparyn qorytyndylaǵan kezde qazaqstandyq jáne sheteldik BAQ ókilderine suhbat bergen bolatyn. Nursultan Nazarbaev Tramppen ekeýara kezdesýi barysynda óńirlik jáne halyqaralyq saıasat máseleleri de qozǵalǵanyn aıtyp, onyń ishinde Ortalyq Azııadaǵy 5 memlekettiń Amerıkamen yntymaqtastyǵynyń S5+1 jobasy jaıy, Aýǵanstan máselesi, Amerıka men Reseı arasyndaǵy jaǵdaı, Ýkraına, Soltústik Koreıa, Sırııa, Iran máseleleri qozǵalǵanyn atap ótken edi.