Qazaqstan, Ýkraına jáne Chehııa polıtsııasy ınternet-alaıaqtardyń eki transulttyq qylmystyq tobyn joıdy

ASTANA. KAZINFORM - Qazaqstan, Ýkraına jáne Chehııa polıtsııasy ınternet-alaıaqtardyń eki transulttyq qylmystyq tobyn joıdy, – dep habarlaıdy Polisia.kz.

– Kıberqylmysqa qarsy is-qımyl sheńberinde ІІM qyzmetkerleri jedel-izdestirý is-sharalaryn júrgizip, ınternet-alaıaqtyqqa sheteldik azamattardyń qatysy bar ekenin anyqtady. Mınıstrlik qyzmetkerleri qyzmettik issapar barysynda Ýkraına Ulttyq polıtsııasymen jáne Chehııa polıtsııasymen birlesip, ınternet-alaıaqtardyń eki transulttyq qylmystyq tobynyń áreketine tosqaýyl qoıdy, – dedi departament bastyǵy – ІІM resmı ókili Shyńǵys Alekeshev.

Zaporoje qalasynda alaıaqtardyń eki call-ortalyǵy joıyldy. Qaskúnemder ózderin bankter men quqyq qorǵaý organdarynyń qyzmetkerleri retinde tanystyryp, qazaqstandyqtarǵa qońyraý shalyp, olardyń shottarynyń derekterin alýǵa tyrysqan. 9 adam ustaldy. 17 kompıýter, 62 mobıldi qurylǵy, sondaı-aq 35 gramm «metadon» preparaty tárkilendi.

Odessa qalasynda úsh alaıaqtyq call-ortalyq taratyldy. Qaskóıler jalǵan ınvestıtsııalyq kompanııalarǵa qarjy salý syltaýymen ınternet-alaıaqtyq jasaǵan. Munda 23 adam ustaldy. 9 kúdikti ýaqytsha ustaý ızolıatoryna qamaldy. 8 avtokólik, 58 noýtbýk, 52 smartfon, 100-den astam sim-karta, sondaı-aq 200 myń AQSh dollarynan astam somaǵa tsıfrlyq aktıvter tárkilendi.

– Qazirgi ýaqytta tergeý jáne jedel-izdestirý amaldary jalǵasýda, – dedi Shyńǵys Alekeshev.