Qazaqstan Úkimeti týrızmdi damytý máselelerin qarastyrady
ASTANA. KAZINFORM — Búgin Úkimet otyrysy ótedi. Onda Mınıstrler kabınetiniń músheleri týrızmdi órkendetý sharalaryn talqylaıdy.
Otyrys qorytyndysy boıynsha baspasóz konferentsııasy uıymdastyrylady. Onda QR Týrızm jáne sport mınıstri Erbol Myrzabosynov, QR Ekologııa jáne tabıǵı resýrstar vıtse-mınıstri Nurken Shárbıev, Kazakh Tourism Development bas atqarýshy dırektory Erjan Erkinbaev, KazakhTourism basqarma tóraǵasy Talǵat Ǵazızov qatysady.
Aıta keteıik, 2025 jyldyń qorytyndysy boıynsha Qazaqstannyń týrızm salasy negizgi kórsetkishter boıynsha turaqty ósim kórsetti. El ishinde saıahattaýshylar sany da, shetelden keletin týrıster aǵyny da artty.
Atap aıtqanda, ornalastyrý oryndarynda toqtaǵan ishki týrıster sany 10,1 mln adamǵa jetip, 2024 jylmen salystyrǵanda shamamen 1 mln-ǵa artty. Sheteldik qonaqtardyń da qyzyǵýshylyǵy ósip keledi: qonaqúı qyzmetin paıdalanǵan týrıster sany 1,4 mln adamdy qurap, ótken jylmen salystyrǵanda 132,3 myńǵa kóbeıdi.
Jalpy, 2025 jyly Qazaqstanǵa túrli týrıstik maqsatpen (jumys isteý nemese turaqty turý úshin kelgenderdi eseptemegende) 15,7 mln shetel azamaty keldi. Onyń ishinde 11,1 mln adam týrıst retinde tirkeldi. Bul kórsetkish te ótken jylmen salystyrǵanda joǵary.
Salanyń ekonomıkalyq tıimdiligi de artyp keledi. Ornalastyrý oryndary, demalys bazalary men qonaq úılerdiń jalpy kirisi 350,6 mlrd teńgeni qurap, bir jylda 50,8 mlrd teńgege ulǵaıdy. Týrıstik ınfraqurylym keńeıip, ornalastyrý nysandarynyń sany 4 482-ge jetti. Bir mezette qabyldaý múmkindigi 233 myńnan astam tósek-oryndy qurady.
Investıtsııalyq belsendilik te kúsheıdi. 2025 jyly týrızm salasyna tartylǵan ınvestıtsııa kólemi 32,6%-ǵa ósip, 1 256,9 mlrd teńgege jetti (2024 jyly — 947,6 mlrd teńge).
Eske salaıyq, naýryz aıynda Memleket basshysy «Qazaqstan Respýblıkasynyń keıbir zańnamalyq aktilerine týrıstik salany jáne balalar sportyn qoldaý máseleleri boıynsha ózgerister men tolyqtyrýlar engizý týraly» Qazaqstan Respýblıkasynyń Zańyna qol qoıdy.
Qujat týrıstik salany damytýǵa qolaıly jaǵdaı jasaýǵa jáne memlekettik qoldaý sharalarynyń tıimdiligin arttyrýǵa baǵyttalǵan.
