Qazaqstan Úkimeti men Qytaı damý ınstıtýty mamandary Alataý qalasyn salý máselesin talqylady
ASTANA. KAZINFORM – Vıtse-premer Qanat Bozymbaev pen Qytaı damý ınstıtýtynyń vıtse-prezıdenti Tszıan Tsıýı Alataý qalasyn salý máseleleri boıynsha kelissózder júrgizdi.
Kezdesýge Qazaqstannyń Ádilet, Ulttyq ekonomıka, Indýstrııa jáne qurylys mınıstrlikteriniń vıtse-mınıstrleri de qatysty.
Alataý qalasy osy jyldyń qańtar aıynda Memleket basshysynyń jarlyǵymen quryldy. Mamyr aıynda qalanyń Bas jospary bekitilse, qazan aıynda Premer-Mınıstrdiń ókimimen vıtse-premer Kanat Bozýmbaev tóraǵalyq etetin Jobalyq keńse quryldy.
«Jobalyq keńse aıasynda zańnamalyq ózgerister engizý, ınvestıtsııa, ınfraqurylym, jer máseleleri jáne saýda boıynsha sarapshylar qaýymdastyǵyn tarta otyryp, úsh jumys toby quryldy. Barlyq toptar tıisti jumystardy atqarýda. Bizge Shenchjen arnaıy ekonomıkalyq aımaǵyn damytýdaǵy tájirıbe qyzyqty. Alataý qalasyn qurý boıynsha yntymaqtastyqqa qýanyshtymyz jáne sizdiń uıymyńyzdy keńesshi jáne konsýltant retinde kórgimiz keledi», – dedi Qanat Bozymbaev.
Qytaı damý ınstıtýty (China Development Institute) – 1989 jyly Shenchjen qalasynda qurylǵan táýelsiz analıtıkalyq ortalyq. 2015 jyldan bastap Qytaıdaǵy jetekshi analıtıkalyq ortalyqtardyń biri retinde tanyldy.
Qytaı damý ınstıtýtynyń vıtse-prezıdenti Tszıan Tsıýı Alatau arnaıy ekonomıkalyq aımaǵyn damytý boıynsha birlesip jumys isteýge qyzyǵýshylyq bildirip, ınstıtýttyń 10 elde AEA qurý tájirıbesi baryn atap ótti. «Biz bilimimizben bólisýge jáne naqty máseleler boıynsha qajetti usynystar berýge daıynbyz», – dedi Qytaı damý ınstıtýtynyń vıtse-prezıdenti Tszıan Tsıýı.
Kelissózder qorytyndysy boıynsha taraptar yntymaqtastyq týraly kelisimge qol qoıýǵa kelisti.
