Qazaqstan Úkimeti Qatar halqyna kóńil aıtty
ASTANA. KAZINFORM — Qazaqstan Respýblıkasy Premer-mınıstriniń orynbasary — ulttyq ekonomıka mınıstri Serik Jumanǵarın sheıh Hamad ben Halıfa Ál Tanıdiń qaıtys bolýyna baılanysty Astanadaǵy Qatar memleketiniń elshiliginde ashylǵan kóńil aıtý kitabyna jazba qaldyrdy. Bul týraly Úkimettiń baspasóz qyzmeti habarlady.
Serik Jumanǵarın Qazaqstan Respýblıkasy Úkimetiniń atynan jáne óz atynan sheıhtiń otbasy men Qatar halqyna qaıǵyra kóńil aıtty. Onymen birge elshilikke Qazaqstan Respýblıkasy syrtqy ister mınıstriniń orynbasary Álibek Qýantyrov ta keldi.
Kóńil aıtý kitabyndaǵy jazbada Qatar memleketin álemdegi asa qarqyndy damýdaǵy memlekettiń birine aınaldyrýda sheshýshi ról atqarǵan dana ári kóregen memleket qaıratkeri retindegi sheıh Hamad ben Halıfa ál Tanıdiń qajyrly eńbegi Qazaqstan halqynyń jadynda da máńgi saqtalatyny atap ótildi. Sondaı-aq onyń Qazaqstan-Qatar qatynasynyń negizin qalap, eki el arasyndaǵy dostyq baılanysty jan-jaqty nyǵaıtýǵa yqpal etken qoldaýy ekijaqty yntymaqtastyq tarıhynda eleýli iz qaldyrǵany erekshe atap ótildi.
Qazaqstan men Qatar arasynda 2000 jyldan bastap, QR Úkimeti men Katar memleketi úkimeti arasyndaǵy kelisimge sáıkes, Qazaqstan-Qatar birlesken komıteti joǵary deńgeıde jumys isteıdi.
Ulttyq ekonomıka mınıstrligi 2015 jyldan beri jumys organy retinde Komıtet qyzmetin onyń 4-shi otyrysynan bastap, qamtamasyz etedi. Qazaqstan-Qatar komıtetiniń teń tóraǵasy — Premer-mınıstrdiń orynbasary — ulttyq ekonomıka mınıstri Serik Jumanǵarın.
Aıta ketelik Qatardyń burynǵy ámiri, resmı túrde «Ámir áke» ataǵyn ıelengen sheıh Hamad ben Halıfa Ál Tanı 74 jasynda dúnıeden ótken edi. Qatarda burynǵy ámirdiń qazasyna baılanysty tórt kúndik aza tutý jarııalandy. Qazaqstan Prezıdenti Qatar Ámiri sheıh Támım ben Hamad Ál Tánımen kezdesip, kóńil aıtty.
