Úkimet gıdroenergetıka salasyn damytý josparyn bekitti
ASTANA. KAZINFORM – Memleket basshysynyń elektr energetıkasy salasyn ártaraptandyrý jónindegi tapsyrmalaryn júzege asyrý sheńberinde Úkimet Qazaqstan Respýblıkasynyń 2035 jylǵa deıingi gıdroenergetıka salasyn damytý josparyn bekitti, dep habarlaıdy Úkimettiń baspasóz qyzmeti.
Premer-mınıstr Oljas Bektenov tıisti qaýlyǵa qol qoıdy.
Qujat elimizdiń gıdroenergetıkalyq áleýetin ıgerýge biryńǵaı uzaqmerzimdi tásildi qalyptastyrady. Bolashaq nysandardy daıyndaý kezinde sý resýrstarynyń bolýy, energııa júıesiniń qajettilikteri, tehnıkalyq múmkindikter, ekologııalyq shekteýler jáne ınvestıtsııalar tartý sharttary eskeriledi.
Jospar alty negizgi baǵyt boıynsha 30 is-sharany qamtıdy. Olardyń qatarynda ózenderdiń sý teńgerimi men energetıkalyq áleýetin baǵalaý, josparlanǵan nysandar boıynsha biryńǵaı derekter bazasyn qalyptastyrý, jer ýchaskelerin daıyndaý, GES pen gıdroakkýmýlıatsııalaý stansalarynyń pýlyn qurý, sondaı-aq kadrlyq jáne ǵylymı-tehnıkalyq qamtamasyz etý máseleleri bar.
Zertteýler qolaıly alańdardy tańdaýǵa, bolashaq nysandardyń parametrlerin aıqyndaýǵa jáne sýmen qamtamasyz etý men qorshaǵan ortaǵa áser etýge baılanysty táýekelderdi aldyn ala eskerýge kómektesedi.
Barlyq aqparat memlekettik organdar men bolashaq ınvestorlar úshin biryńǵaı derekkózi bolatyn tsıfrlyq platformada biriktiriledi. Óndirýshi qýattardy keńeıtý sheńberinde 2030 jyldyń sońyna deıin gıdroenergetıkanyń keminde 500 MVt jańa qýatyn iske qosý kózdelgen.
Sondaı-aq, gıdroakkýmýlıatsııalyq elektr stansasyn salý máselelerine nazar aýdaryldy. Jańa nysandardy iske qosý óńirlerdi energııamen jabdyqtaý senimdiligin jáne Biryńǵaı elektr energetıkalyq júıesiniń turaqtylyǵyn arttyrady. Alańdardy tańdaý kezinde sý teńgerimi men tabıǵatty qorǵaý talaptary eskeriledi, bul qorshaǵan ortaǵa áserdi barynsha azaıtýǵa múmkindik beredi.
-Nátıjesinde Qazaqstan sý resýrstaryn zertteýden jáne alańdardy tańdaýdan bastap, mamandardy daıarlaý men naqty nysandardy iske qosýǵa deıin gıdroenergetıkalyq áleýetti ıgerýdiń júıeli negizin qalyptastyrady,-delingen habarlamada.
Osyǵan deıin Úkimettiń energetıka jáne kommýnaldyq sektorlardy jańǵyrtýǵa nazar aýdaratyny týraly jazdyq.
