Qazaqstan Úkimeti Fınlıandııa ınvestorlaryna jan-jaqty qoldaý kórsetedi - Premer
ASTANA. KAZINFORM – Qazaqstannyń Premer-mınıstri Oljas Bektenov elimizge resmı saparmen kelgen Fınlıandııa Prezıdenti Aleksandr Stýbbpen kezdesý ótkizdi.
Onda saýda-ekonomıkalyq jáne ınvestıtsııalyq yntymaqtastyqqa, ónerkásiptegi, energetıkadaǵy, tsıfrlyq, kóliktik-logıstıkalyq jáne sý salalaryndaǵy, sondaı-aq qarjy men agroónerkásip keshenindegi ózara is-qımylǵa nazar aýdaryldy.
QR Premer-mınıstri Úkimet joǵary deńgeıde qol jetkizilgen barlyq ýaǵdalastyqtardyń júzege asyrylýyn qadaǵalaýǵa alatynyn atap ótti. Fınlıandııa – Qazaqstannyń Eýropalyq odaqtaǵy mańyzdy seriktesteriniń biri.
Kelissózder barysynda saýdany odan ári ulǵaıtýda, onyń qurylymyn ártaraptandyrýda, sondaı-aq ekonomıkanyń negizgi sektorlaryna jańa tehnologııalar engizýde eleýli áleýet bary atap ótildi.
Qazaqstanda birlesken ınvestıtsııalyq jobalardy júzege asyrý, sonyń ishinde kólik salasyna qatysty logıstıkalyq ortalyqtar, eksportqa baǵdarlanǵan óndiristik alańdar jáne taǵy da basqa nysandar salý jónindegi josparlar talqylandy.
Eki eldiń tsıfrlyq transformatsııa salasyndaǵy túıisý núkteleri – Prezıdent belgilep bergen Qazaqstannyń strategııalyq basymdyǵy retinde atap ótildi. Elimizde sýperkompıýterdiń iske qosylýyn alǵa tarta otyryp, qazaqstandyq tarap Eýropadaǵy eń qýatty sýperkompıýterlerdiń biri – LUMI-men jumys isteıtin Fınlıandııamen tájirıbe almasýǵa ázir ekendigin bildirdi.
«Memleket basshysy atap ótkendeı, Qazaqstan Fınlıandııamen yntymaqtastyqtyń jańa baǵyttaryn damytýǵa daıyn. Biz ekonomıkanyń basym sektorlarynda birlesken jobalardy júzege asyrýǵa múddelimiz. Úkimet elimizge kelgen ınvestorlarǵa jan-jaqty qoldaý kórsetedi», - dep atap ótti Oljas Bektenov.
Fınlıandııa prezıdenti Aleksandr Stýbb Qazaqstannyń ınvestorlarǵa qolaıly jaǵdaı jasaý boıynsha júrgizip jatqan jumystaryna oń baǵa berip, eki el arasyndaǵy yntymaqtastyqty tereńdetýge múddeli ekenin bildirdi.
Aıta keteıik, Aleksandr Stýbbtyń elimizge resmı sapary aıasynda 15 qujatqa qol qoıyldy.