Dúnıejúzilik bank Qazaqstannyń óńirlik kóshbasshy retindegi róli nyǵaıa túsetinin boljady
ASTANA. KAZINFORM - QR Premer-Mınıstri Álıhan Smaıylov Dúnıejúzilik banktiń Ortalyq Azııa boıynsha óńirlik dırektory Tatıana Proskýrıakovamen kezdesti.
QR Úkimeti baspasóz qyzmetiniń habarlaýynsha, kezdesýde taraptar ekonomıkany damytý, tsıfrlandyrýdy engizý, qorshaǵan ortany qorǵaý jáne t.b. salalar boıynsha birlesken jobalardy iske asyrý máselelerin talqylady. Úkimet basshysy 30 jyldyq seriktestik barysynda elimizde jalpy somasy $8 mlrd astam 48 birlesken jobanyń sátti iske asyrylǵanyn atap ótti. Búginde 6 joba belsendi túrde júzege asyrylyp jatyr.
Premerdiń aıtýynsha, Dúnıejúzilik bankpen seriktestik ınklıýzıvti jáne turaqty damýǵa qol jetkizý úshin Qazaqstanda iske asyrylyp jatqan reformalardy qoldaýǵa baǵyttalǵan. 20 jyldan astam sátti júzege asyrylyp jatqan Birlesken ekonomıkalyq zertteýler baǵdarlamasy onyń aıqyn mysaly bolyp tabylady.
«Qazaqstan Úkimeti Dúnıejúzilik bankpen seriktestikti ári qaraı nyǵaıtýǵa nıetti», — dep atap ótti Álıhan Smaıylov.
Óz kezeginde Tatıana Proskýrıakova Uıym Qazaqstan boıynsha jańa jobalardy daıyndaýdy jandandyrǵanyn, oǵan byltyr tamyzda ótken kelissózderdiń yqpal etkenin atap ótti. Onyń ishinde Úkimettiń shalǵaı eldi mekenderdi ınternetke qosý baǵdarlamasy da bar.
«Bul Ortalyq Azııadaǵy barlyq el úshin jaqsy úlgi bolady dep oılaımyn. Meniń oıymsha, Qazaqstannyń óńirlik kóshbasshy retindegi róli nyǵaıa túspek», — dedi ol.
