Qazaqstan Úkimeti Japonııaǵa qarjylaı jáne gýmanıtarlyq kómek jasaıdy - SІM
ASTANA. 11 sáýir. QazAqparat /Rýslan Ǵabbasov/ - Búgin Qazaqstannan Japonııaǵa gýmanıtarlyq júk jóneltiledi. Bul týraly Astanada ótken aptalyq brıfıngte Syrtqy ister mınıstrliginiń resmı ókili Asqar Ábdirahmanov málim etti.
Resmı ókildiń sózine qaraǵanda, Japonııadaǵy zilzaladan keıingi apatqa baılanysty Qazaqstan Úkimeti Japonııaǵa 1 mln. AQSh dollary kóleminde qarjylaı kómek jasaýdy jáne 33 tonna kóleminde et konservilerin jetkizý týraly sheshim qabyldady. «QR Tótenshe jaǵdaılar mınıstrliginiń ushaǵy osy júkpen búgin Japonııaǵa attanady»,-dedi A. Ábdirahmanov.
Aıta keteıik, 1 mln. AQSh dollary kólemindegi qarjy Japonııanyń Qyzyl Krest qoǵamyna aýdarylady.
