Qazaqstan Úkimeti Ulttyq ınvestıtsııalyq strategııany bekitti

Atap aıtqanda, strategııanyń negizgi maqsaty - tıimdilikti arttyrýǵa baǵyttalǵan qolaıly ınvestıtsııalyq klımat qurý jáne ınvestıtsııa tartý.

«Strategııa tabysty iske asatyn bolsa, bes jyldyń ishinde tikeleı sheteldik ınvestıtsııanyń jalpy aǵynynyń kezeń-kezeńimen ekonomıkaǵa 26 paıyzǵa deıin, al tıimdilikti arttyrýǵa jáne eksportqa baǵyttalǵan ınvestıtsııalar 50 paıyzǵa deıin ósedi degen boljam bar. Sonymen qatar, ishki ınvestıtsııalardyń ósýi de boljanyp otyr. Shıkizattyq emes sektordyń negizgi kapıtalyna salynǵan ınvestıtsııalar  kólemi 46 paıyzǵa deıin ósedi dep kútilýde», - dedi Investıtsııalar jáne damý mınıstri Jeńis Qasymbek.

Mınıstrlik Dúnıejúzilik bankpen birlesip, tıimdilikti arttyrýǵa baǵyttalǵan jańa ınvestıtsııa tartýǵa utymdy salalardy belgiledi. Bul salalar eki topqa bólinedi.

«Birinshiden, bul - «qoldanystaǵy áleýetti salalar», ıaǵnı azyq-túlik ónerkásibi, munaı-gaz jáne paıdaly qazbalardy qaıta tereń óńdeý (metallýrgııa, hımııa jáne munaı-hımııa) jáne mashına jasaý. Bul top qysqa merzimdi nemese orta merzimdi keleshekte tıimdilikti arttyrýǵa baǵyttalǵan tikeleı sheteldik ınvestıtsııany ilgeriletý múmkindigi joǵary salalardan turady. Ekinshi topta «perspektıvaly salalar» qamtylǵan, ıaǵnı AKT, týrızm jáne qarjy. Bul top uzaq merzimdi keleshekte ınvestorlardy qyzyqtyrýy múmkin salalardan turady», - dedi mınıstr.

Jalpy, strategııany iske asyrý ınvestıtsııa salasyn túbegeıli reformalaýǵa, ınvestıtsııa aǵynynyń ósimine qol jetkizýge jáne el ekonomıkasynyń turaqty ósimin qamtamasyz etýge múmkindik beredi.

«Strategııada ınvestıtsııalar tartý úshin basymdyqty elder aıqyndaldy. Ekonomıkalyq múmkindikterdi eskere otyryp, áleýetti ınvestor bolyp sanalatyn 36 el belgilendi, onyń ishinde 11-iniń biz úshin basymdyǵy joǵary. 25 jyl ishindegi tájirıbege súıensek, bul elder Qazaqstan ekonomıkasyna negizgi ınvestor bolyp otyr», - dedi vedomstvo basshysy.