Qazaqstan Úkimeti Qyrǵyz elindegi sý qoımasynyń qaýipsizdigin qamtamasyz etýdi óz baqylaýyna alýy tıis - A. Momyshev
ANA. Sáýirdiń 14-i. QazAqparat /Qanat Mámetqazyuly/ - Qyrǵyz elindegi qalyptasqan ahýalǵa baılanysty Qazaqstan Úkimeti Qyrǵyzstandaǵy sý qoımasynyń qaýipsizdigin qamtamasyz etýdi óz baqylaýyna alýy tıis.
Búgin QR Parlamenti Májilisiniń jalpy otyrysynda Úkimet basshysynyń atyna saýal joldaǵan depýtat Amangeldi Momyshev osylaı málim etti, dep habarlaıdy QazAqparat.
«Sáýirdiń 7-si kúni Taraz qalasy men onyń mańyndaǵy eldi mekender úlken dúrbeleńge tústi. Buǵan sebep kórshiles Qyrǵyz elindegi oqıǵalar barysynda Talas oblysyndaǵy búlinshilikke qatysýshylarynyń málimdeme jasap, birshama sharttaryn jarııalaǵany týraly áńgimeden týyp otyr. Olar eger qazaqstandyqtar prezıdent Bákıevke járdemdesip, ony panalatýǵa kómek beretin bolsa Kırov sý qoımasyn jaryp jiberetindikterin aıtyp, qorqytqan. Bul sý qoımasynyń jarylý múmkindigi týraly ósek halyqtyń arasyna lezde tarap, jurt úlken ábirjýlerdi bastan keshken. Adamdar óz úılerin tastap, kólikpen, taksımen jan- jaqqa jansaýǵalady. Shyndyǵynda, eger 500 mln. tekshe metr sýy bar sý qoımasy jarylatyn bolsa, bul jerden nebári 40 shaqyrym qashyqtyqta ornalasqan Taraz qalasyn bir saǵattyń ishinde-aq shaıyp ketetini sózsiz edi», dedi depýtat.
Sonymen birge, A. Momyshev Qazaqstan Úkimetiniń Qyrǵyz bıligimen Kırov sý qoımasynyń qaýipsizdigin qamtamasyz etý jóninde kelisim jasaýy tıistigin atap ótti. «Sý qoımasynyń qaýipsizdigin qamtamasyz etý úshin bul jerge qysy -jazy, kúndiz-túni baqylap turatyn áskerılendirilgen kúzet qajet. Jalpy, Kırov sý qoımasynyń qaýipsizdigin biz óz qolymyzǵa almaıynsha, Jambyl oblysynyń turǵyndary úreıden, qorqynyshtan kóz ashpaıtyn bolady», dedi A. Momyshev.
