Qazaqstan Úkimeti halyqqa adal qyzmet etti - Kárim Másimov
ASTANA. 8 sáýir. QazAqparat /Rýslan Ǵabbasov/ - Qazaqstan Úkimeti elimizdiń halqyna adal qyzmet etti. QR Konstıtýtsııasynyń 70-babynyń 1-tarmaǵyna sáıkes, búgin jańadan saılanǵan Qazaqstan Respýblıkasy Prezıdentiniń aldynda óz ókilettigin doǵarǵan Úkimettiń sońǵy otyrysynda eks Premer-Mınıstr Kárim Másimov osylaı málimdedi.
"Búgin - óte mańyzdy kún. Úkimettiń barlyq músheleriniń atynan Nursultan Nazarbaevty saılaýdaǵy jeńisimen jáne búgin Prezıdent retinde qyzmetine resmı kirisýimen quttyqtaımyn»,-dedi K. Másimov Úkimet otyrysynyń bastalýy kezinde.
Sonymen qatar osy sátten bastap Úkimettiń ókilettiligi doǵarylatynyna toqtalǵan Premer-Mınıstr, «Úkimettiń barlyq múshelerine osy jyldardaǵy birlesken jumysy úshin alǵysymdy aıtqym keledi. Menińshe, biz barlyǵymyz Prezıdentimizge, Qazaqstan halqyna adal qyzmet ettik»,-dedi.
Aıta keteıik, K. Másimov basshylyq etken Úkimettiń quramy 2007 jylǵy 10 qańtardan bastap qyzmet atqardy.
«Meniń oıymsha, biz, árqaısymyz Úkimettiń osy quramynda qyzmet atqarǵan ár kúnimiz úshin uıalmaımyz. Biz qolymyzdan kelgenniń barlyǵyn istedik. Óz atymnan birlesip jumys istegen ár kúnimiz úshin barshańyzǵa alǵysymdy aıtamyn»,-dedi K. Másimov.
Úkimettiń ókilettigin doǵarǵany týraly qujat Memleket basshysynyń qaraýyna engizgennen keıin Elbasy Úkimet otstavkasyn qabyl alady. Jańa Úkimet jasaqtalǵanǵa deıin Úkimet músheleri óz laýazymdarynda mindet atqarýshy bolyp qala beredi.
