Qazaqstan Úkimeti ákimshilik is júrgizý zańnamasyn jetildirýdi kózdep otyr

Osyǵan oraı Úkimet «Qazaqstan Respýblıkasynyń keıbir zańnamalyq aktilerine ákimshilik is júrgizý zańnamasynyń máseleleri boıynsha ózgerister men tolyqtyrýlar engizý týraly» zań jobasyn Májilistiń qaraýyna usyndy, dep habarlaıdy QazAqparat.

Zań jobasyn qabyldaýdyń maqsaty qoldanystaǵy zańnama normalaryn Qazaqstan Respýblıkasynyń Ákimshilik is júrgizý kodeksi men Qazaqstan Respýblıkasynyń Ákimshilik quqyq buzýshylyq týraly kodeksi (jańa redaktsııa) jobalarymen sáıkes keltirý, sondaı-aq joǵaryda kórsetilgen zań jobalarymen retteletin qoǵamdyq qatynastardyń arajigin ajyratý bolyp tabylady.

Atap aıtqanda, zań jobasymen Qazaqstan Respýblıkasynyń Azamattyq is júrgizý kodeksine ákimshilik quqyq buzýshylyq týraly isterdi qaraýǵa ýákiletti organdardyń qaýlylaryna daý aıtý týraly ister boıynsha is júrgizýdi reglamentteıtin normalardy alyp tastaý bóliginde túzetý qarastyrylǵan.

«Normatıvtik quqyqtyq aktiler týraly» Qazaqstan Respýblıkasy Zańyn ákimshilik is júrgizý zańnamasymen retteletin qoǵamdyq qatynastar tizbesin tolyqtyrý kózdelýde.

Al «Lıtsenzııa týraly» Qazaqstan Respýblıkasynyń Zańyna ákimshilik quqyq buzýshylyq bolyp tabylmaıtyn zańdyq faktiler úshin lıtsenzııanyń qoldanylýyn toqtata turý jáne odan aıyrý tártibi men negizderin bekitý bóligine tolyqtyrý engizilmek.

Sol sekildi Keden kodeksine, Qazaqstan Respýblıkasynyń «Notarıat týraly», «Advokattyq qyzmet týraly», «Jekelegen qarý túrleriniń aınalymyna memlekettik baqylaý jasaý týraly», «Kúzet qyzmeti týraly», «Baılanys týraly» zańdarǵa jáne basqa da zańdarǵa lıtsenzııanyń qoldanylýyn toqtata turý jáne odan aıyrý negizderin alyp tastaý bóliginde túzetýler engiziledi.