Qazaqstan-Ýels matchy: brıtandyq baspasózge sholý
ASTANA. KAZINFORM – Toǵyz aılyq tyńǵylyqty daıyndyqtan keıin Ýels Astanada jeńiske jetetinine senip otyr, dep habarlaıdy Kazinform menshikti tilshisi.
Búgin Qazaqstan men Ýels quramalary «Astana Arena» stadıonynda 2026 jylǵy fýtboldan álem chempıonatyna irikteý matchynda kezdesedi. Match qarsańynda Ulybrıtanııa men Ýels baspasóziniń nazary tek sporttyq ıntrıgaǵa ǵana emes, qyzyqty oqıǵanyń fýtbolǵa qatysty aspektilerine de aýdarylǵan.
Ýels matchqa toǵyz aı daıyndaldy
BBC Sport maqalasynda Ýels quramasynyń Qazaqstanǵa qarsy álem chempıonatynyń irikteý kezeńindegi syrt alańda daıyndyǵy týraly baıandalady. Eýropalyq fýtbolda syrttaǵy eń qıyn tapsyrmalardyń biri — 5 myń shaqyrymnan astam qashyqtyq.
Daıyndyq 2024 jyldyń jeltoqsanynda bastaldy. Jerebeden keıin birden Ýels fýtbol federatsııasy qonaqúılerdi tańdap, josparlanǵan reısterdi jáne logıstıkany josparlady.
Sonymen qatar, doptyń túri, jasandy jabyn, kólik, tamaq máselesine de erekshe nazar aýdaryldy.
Oıynǵa birneshe apta qalǵanda Astanaǵa tanysý sapary uıymdastyrylady: stadıon, qonaqúı, trafık, klımat, elektr rozetkalary, tipti komandanyń serýendeý joldary da tekseriledi.
Komandanyń aspazy aldyn ala ushady, as máziri bir aı buryn kelisiledi. Olar ózderimen birge tipti kofe mashınasyn, keń ekrandy teledıdar jáne kıim aýystyratyn bólmege arnalǵan stereo júıeni ákeledi.
«Sodan keıin ǵana, toǵyz aılyq daıyndyqtan keıin bári qarapaıym tapsyrma — 90 mınýttyq fýtbolǵa túsedi», — dep jazdy BBC Sport.
Ýels ambıtsııalaryna qarsy jasandy jabyn
Wales Online basylymy Ýels quramasynyń bas bapkeri Kreıg Bellamıdiń 30 myń oryndyq «Astana Arena» stadıonynyń jasandy jabyny týraly aıtqan pikirine nazar aýdardy.
Bellamı atap ótkendeı, arena tolyǵymen FIFA standarttaryna saı bolǵanymen, mundaı deńgeıdegi komandalar fýtbolshylardyń jaraqat alý qaýpin azaıtý úshin tabıǵı jabyn ústinde oınaýy kerek. Bul rette bapker Ýels kez kelgen jaǵdaıǵa beıimdelýge daıyn jáne matchta oryn alǵan jaǵdaıǵa qaramastan onyń qorytyndysyna syltaý izdemeıtinine sendirdi.
Fýtbol odısseıasy: jankúıerdiń bes aptalyq shytyrman oqıǵasy
The Guardian 2026 jylǵy álem chempıonatynyń irikteý matchynda ulttyq quramaǵa qoldaý kórsetý úshin bes aptada Ońtústik Ýelsten Qazaqstanǵa barǵan Ýels fýtbolynyń jankúıeri Djon Makallısterdiń keremet saıahaty týraly baıandaıdy.
26 jastaǵy Makallıster Astanaǵa 17 poıyz jáne 11 avtobýspen 5 myń shaqyrymdaı jol júrip, tolyǵymen derlik áýe qatynasynsyz jetken. Ýels quramasynyń bas bapkeri keremet jankúıerdi shynaıy adaldyqtyń úlgisi dep atady.
Shyǵysqa saıahaty kezinde Makallıster Frantsııa, Belgııa, Germanııa, Nıderland, Balqan, Túrkııa, Grýzııa jáne eń sońynda Qazaqstanda boldy.
Ol 11 matchty, sonyń ishinde chempıondar lıgasynyń Almatyda ótken «Qaırat» pen «Seltık» oıynyn tamashalap úlgerdi.
Onyń sapary tek fýtbol týry ǵana emes, sonymen qatar mádenı shytyrman oqıǵa boldy: ol jergilikti sýsyndardan dám tatty, stıhııalyq rok-kontsertke qatysty, tipti úılený toıyna shaqyrý aldy.
Bás tigý jasaldy: býkmekerlik keńseler nege Ýelske senip otyr?
Independent gazetindegi maqala býkmekerlik keńselerdiń boljamyna nazar aýdardy. Olardyń pikirinshe, Ýels — básekeniń aıqyn favorıti, al FIFA kestesinde ýelstikterden 83 saty tómen ornalasqan Qazaqstannyń tabysy ekitalaı dep baǵalanyp, oǵan tek táýekelshil oıynshylar ǵana bás tigedi.
«Ýels álem chempıonatyna ekinshi ret qatarynan qatysý úshin osy oıynnan barlyq úsh upaıdy alý kerek ekenin túsinip otyr. Bul olar úshin salystyrmaly túrde ońaı tapsyrma bolýy kerek», — dep jazdy Independent.
Tanymal bás tigý — Ýelstiń eki gol aıyrmashylyǵymen jeńiske jetýi. Býkmekerlik keńseler ásirese 28 jastaǵy shabýyldaýshy jartylaı qorǵaýshy Garrı Ýılsonǵa erekshe nazar aýdaryp otyr, ol óz eliniń quramasy úshin sońǵy bes oıynda úsh gol soqqan. Onyń oıynnyń kez kelgen sátindegi goly óte joǵary baǵalanady.
Sondaı-aq onyń komandanyń negizgi penaltı oryndaýshysy ekendigi atap ótiledi, bul bás tigýdi odan da tartymdy etip otyr.
Buǵan deıin shotlandııalyq BAQ almatylyq klýbtan jeńilgen «Seltıkti» synaǵanyn jazǵan bolatynbyz.
Qazaqstan quramasynyń bas bapkeri Ýelspen bolatyn oıynǵa qatysty pikir bildirdi.
Eske sala ketsek, búgin fýtboldan Qazaqstan quramasy 2026 jylǵy álem chempıonaty irikteý kezeńindegi tórtinshi oıynyn Ýelske qarsy ótkizedi.
Qazaqstan — Ýels kezdesýinde kim tórelik etetinin myna materıaldan oqı alasyz.