Qazaqstan UEFA-men qarym-qatynasty nyǵaıtady
ASTANA. KAZINFORM – UEFA prezıdenti Aleksander Cheferın halyqaralyq arnamyz – Silk Way-ge suhbat berdi.
UEFA basshysy aldymen Qasym-Jomart Toqaevtyń sport janashyry, jankúıeri ekenin atap ótti. Sondaı-aq Memleket basshysymen qazaqstandyq fýtboldy damytý joldaryn talqylaǵanyn aıtty.
– Bul sizdiń Qazaqstanǵa jáne Ortalyq Azııaǵa alǵashqy saparyńyz ekenin bilemiz. Prezıdent Toqaevpen qandaı máselelerdi talqylaǵanyńyz qyzyq bolyp tur. Buǵan Qazaqstan fýtbol federatsııasynyń basshylyǵymen kezdeskenińizdi jáne bolashaq sharalardy talqyladyńyzdar. Osyǵan qysqasha toqtalyp ótseńiz, - dep surady arna tilshisi.
Óz kezeginde Aleksander Cheferın aldaǵy ýaqytta Qazaqstanda aýqymdy fýtbol oıyndaryn ótkizýge bolatynyn aıtty.
– Prezıdent Qasym-Jomart Toqaev sportty, sonyń ishinde fýtboldy da erekshe jaqsy kóredi eken. Biz Qazaqstan jáne Eýropa fýtboly týraly kóp sóılestik. Fýtboldy damytý kerektigin de talqyladyq. Infraqurylymdy damytý eń mańyzdy másele ekenin aıttyq. Qazaqstanda birqatar stadıon salamyz. Eger ınfraqurylym talaptarǵa saı kelse, men Qazaqstanǵa taǵy kelemin jáne bul jaqta da keleshekte mańyzdy matchtardy ótkize alamyz, - dedi UEFA prezıdenti.
Ol sonymen qatar Memleket basshysymen UEFA Kongresin ótkizý týraly, ekijaqty seriktestikti arttyrý jaıyn, áıelder fýtbolyna qoldaý kórsetý jóninde de sóıleskenin tilge tıek etti.
– UEFA Kongresin ótkizý máselesin de talqyladyq. Prezıdent tarapynan kúshti qoldaýdy sezindik. Bizde qarjylaı qoldaýǵa baılanysty birneshe baǵdarlama bar, olardy osy jerde júzege asyramyz. Biz sarapshylarmen de kómektese alamyz. Meniń oıymsha, ekijaqty seriktestikti nyǵaıtýymyz kerek. Qazir damý úshin jaqsy kezeń. Sizderdiń ulttyq quramalaryńyz myqty bolyp kele jatyr. Talantty jas oıynshylar da kóbeıdi. Budan bólek, biz áıelder fýtbolyna kóp qarajatty ınvestıtsııa retinde quıamyz. Sebebi, áıelder fýtboly - salystyrmaly túrde erlerge qaraǵanda jas sport. Barlyq 55 qaýymdastyq tıisti qarjylaı kómekke ıe bolady. Qazir Qazaqstanmen aradaǵy qarym-qatynas óte jaqsy. Aldaǵy ýaqytta bul baılanys tek nyǵaıady dep senemiz. Búgingi kezdesý tamasha ótti. Prezıdent Toqaevqa bizge ýaqyt bólgeni úshin taǵy da alǵys bildiremin, - dedi Cheferın.
Buǵan deıin Memleket basshysy Qasym-Jomart Toqaev UEFA prezıdenti Aleksander Cheferındi qabyldaǵanyn jazǵan edik.
Sondaı-aq Eýropa fýtbol qaýymdastyqtary Odaǵynyń (UEFA) prezıdenti Qazaqstan fýtbol federatsııasynyń keńsesindegi otyrysqa qatysyp, Qazaqstan fýtboly týraly aıtty.