Qazaqstan U19 bokstan álem chempıonatynda tórtinshi oryn aldy
ASTANA. KAZINFORM — Qazaqstan quramasy Chernogorııanyń Býdva qalasynda 19 jasqa deıingi sportshylar arasynda ótken bokstan álem chempıonatynda bir altyn, úsh kúmis jáne tórt qola medal jeńip aldy.
Qazaqstan qorjynyna jalǵyz altyn medaldi 80 keliden joǵary salmaq dárejesinde óner kórsetken Zarına Tolybaı saldy. Fınalda otandasymyz Reseı ókili Samıra Itonıevany jeńdi.
Taǵy úsh qazaqstandyq boksshy kúmis júldeger atandy. Alına Qudaıgenova (57 kelige deıin) fınalda reseılik Anastasııa Golýnovadan jeńilip qaldy.
Bıbarys Áshirbaı (70 kelige deıin) ırlandııalyq Djon Donohıge ese jiberse, Vladıslav Samojonov (90 keliden joǵary) Ózbekstan ókili Islam Salıhovtan jeńildi.
Qola medaldi Madıra Jumaqan (51 keli), Indıra Qydyrmoldaeva (60 keli), Danııar Aqbısenov (60 keli) jáne Erketań Jarqynbek (90 keli) ıelendi.
Jalpykomandalyq esepte bes altyn jáne bes kúmis medal jeńip alǵan Reseı quramasy birinshi orynǵa shyqty. Úsh altyn, eki kúmis jáne eki qola medal enshilegen Ózbekstan boksshylary ekinshi orynǵa turaqtasa, eki altyn, bir kúmis jáne eki qola medal alǵan AQSh quramasy úzdik úshtikti túıindedi.
QR UOK málimetinshe, Qazaqstan quramasy jalpykomandalyq esepte tórtinshi orynǵa jaıǵasty.
Aıta keteıik, Jámıla Baqbergenova Astanadaǵy álem chempıonatynyń jartylaı fınalyna ótti.
