Qazaqstan TJM áýletteri: urpaqtan urpaqqa jalǵasqan mamandyqqa adaldyq
ASTANA. KAZINFORM - Qutqarýshy mamandyǵy batyldyqty, janqııarlyqty jáne kez kelgen sátte kómekke kelýge daıyn bolýdy talap etedi. Qazaqstannyń azamattyq qorǵaý júıesinde birneshe urpaǵy osy salada qyzmet etip kele jatqan otbasylar az emes. Ákeler óz balalaryna kásibı tájirıbesin berip, jaýapkershilikke jáne tańdaǵan mamandyǵyna adal bolýǵa úıretedi.
Bul áýletterdiń tarıhy – urpaqtar sabaqtastyǵynyń, otbasylyq qundylyqtar men qutqarýshylardyń kúrdeli eńbegine degen qurmettiń jarqyn úlgisi.
Qarabalınder áýleti – qaýipsizdik kúzetinde 100 jyldan astam eńbek ótili. Áýlettiń negizin qalaýshy Aldabergen Qarabalın órtke qarsy qyzmetke 34 jyldan astam ýaqytyn arnady. Ol Ekibastuz qalasyndaǵy qaraýyl bastyǵynan bastap, Pavlodar oblysy TJD bastyǵynyń orynbasaryna deıingi joldan ótti. 2009 jyly azamattyq qorǵaý polkovnıgi ataǵymen eńbek demalysyna shyqty. Onyń inisi Shoqan men qaryndasy Aıagóz de órt sóndirý qyzmetinde eńbek etti. Áýlettiń kásibı dástúrin uly Esenjol Qarabalın jalǵastyrdy. Ol 2003 jyldan beri órtke qarsy qyzmette eńbek etip keledi jáne búginde Pavlodar oblysy TJD Órt sóndirý jáne avarııalyq-qutqarý jumystary qyzmetiniń № 5 órt sóndirý bóliminiń qaraýyl bastyǵy qyzmetin atqarady. Esenjol iri órtterdi sóndirýge birneshe ret qatysyp, sporttyq jetistikterimen tanylǵan. Ol – órt-qutqarý sporty boıynsha sport sheberi.
Núkishevter áýleti – bir ǵasyrdan astam kásibı tájirıbe. Bul otbasynyń tarıhy órtke qarsy qyzmettiń qalyptasýy men damýyna tikeleı baılanysty. Seıtjan Núkishev azamattyq qorǵaý júıesinde 30 jyldan astam eńbek etip, qatardaǵy qyzmetkerden oblystyq órtke qarsy qyzmet basshysyna deıingi joldan ótti. Órt sóndirý salasynda 30 jyl eńbek etken jubaıy Roza da onyń qyzmettegi qıyndyqtary men jaýapkershiligin birge bólisti. Búginde otbasylyq dástúrdi uly Nurlan Núkishev jalǵastyryp keledi. Ol Soltústik Qazaqstan oblysy TJD Órt sóndirý jáne avarııalyq-qutqarý jumystary qyzmetiniń bastyǵy qyzmetin atqarady. Ardagerlerdiń tájirıbesi men mamandyqqa adaldyǵy jas qyzmetkerlerdi kásibı turǵyda tárbıeleýdiń mańyzdy negizi bolyp otyr.
Eńsebaevtar áýleti – adamdarǵa qyzmet etý jolyn tańdaǵan áke men bala. Marat Eńsebaev órtke qarsy qyzmettegi eńbek jolyn 1997 jyly bastap, órt sóndirýshiden Esil aýdanynyń tótenshe jaǵdaılar bóliminiń bastyǵyna deıin kóterildi. Onyń basshylyǵymen bólim joǵary nátıjelerge qol jetkizip, 2012 jyly «Úzdik tótenshe jaǵdaılar bólimi» nomınatsııasy boıynsha respýblıkalyq baıqaýda birinshi oryn aldy. Ákesi tańdaǵan joldy uly Jasulan da jalǵastyrdy. Qazaqstan Respýblıkasy Qarýly kúshterindegi qyzmetin aıaqtaǵannan keıin ol órt sóndirýshiler qataryna qosyldy. Tirshilik qaýipsizdigi jáne qorshaǵan ortany qorǵaý salasynda joǵary bilim alǵan Jasulan otbasylyq dástúrdi jalǵastyryp, tótenshe jaǵdaılardan qorǵaý baǵytyndaǵy kásibı bilimin jetildirýge umtylyp keledi.
Kamıevter áýleti – órt sóndirýshilerdiń úsh býyny. Áýlettiń negizin qalaǵan Rapıgolla Kamıev 1972–1985 jyldary órt sóndirý qyzmetinde eńbek etti. Onyń uly Talǵat áke jolyn jalǵastyryp, Almaty órt-tehnıkalyq ýchılışesin támamdady. Ol qaraýyl bastyǵynan órt sóndirý bóliminiń bastyǵyna deıingi qyzmettik joldan ótip, ishki qyzmet maıory ataǵymen zeınetke shyqty. Qyzy Saltanat ta órtke qarsy qyzmette radıotelefonıst bolyp 24 jyl jumys istedi. Búginde áýlettiń dástúrin nemeresi, azamattyq qorǵaý maıory Qýanbek Kamıev jalǵastyryp keledi. Ol № 6 órt sóndirý bóliminiń bastyǵy qyzmetin atqarady. Qyzmet jyldarynda órtterdi sóndirýge qatysyp, kásibıligimen jáne qaramaǵyndaǵy qyzmetkerlerge degen qamqorlyǵymen kózge túsken. Bul otbasynyń tarıhy mamandyqqa degen qurmet pen qyzmettik dástúrlerdiń urpaqtardy biriktiretinin kórsetedi.
Shaıkramovtar áýleti – erlik pen batyldyqty urpaqqa mura etken otbasy. Áýlet basshysy Anvar Shaıkramov «Órttegi erligi úshin» medali men «Qurmet belgisi» ordeniniń ıegeri, ómirin órtke qarsy qyzmetke arnaǵan azamat. Balalar ınternatyndaǵy órtti sóndirý kezinde aýyr jaraqat alǵanyna qaramastan, ol qyzmetine qaıta oralyp, mamandyǵyna degen adaldyǵyn kórsetti. Anvar Shaıkramov órtke qarsy qyzmet ardageri jubaıy Elızavetamen birge bes bala tárbıelep ósirdi. Olardyń uly Zakır Jambyl oblysynyń memlekettik órtke qarsy qyzmet basqarmasy bastyǵynyń orynbasary laýazymyna deıin kóterildi. Áýlet dástúrin nemereleri Rýslan, Mansur jáne Nazıra jalǵastyrdy. Solardyń biri Mansur Shaıkramov órtke qarsy qyzmette 20 jyldan astam eńbek etip, Jambyl oblysy TJD Órt sóndirý jáne avarııalyq-qutqarý jumystary qyzmeti bastyǵynyń orynbasary qyzmetin atqarady.
Erejepovter áýleti – kásibılik pen qyzmetke adaldyqtyń úlgisi. Ýálıhan Erejepov Ońtústik Qazaqstan oblysynyń azamattyq qorǵanys jáne tótenshe jaǵdaılar júıesin jıyrma jyldan astam ýaqyt basqardy. Kópjyldyq eńbegi úshin ol II dárejeli «Aıbyn» ordenimen jáne kóptegen memlekettik nagradalarmen marapattalǵan. Sonymen qatar jas mamandardy daıarlaýǵa eleýli úles qosty. Ákesiniń kásibı jolyn qyzy Elmıra Erejepova jalǵastyrdy. Órt qaýipsizdigi salasynda bilim alǵan ol azamattyq qorǵaý polkovnıgi atanyp, Shymkent qalasy TJD Memlekettik órt baqylaý basqarmasynyń bastyǵy qyzmetine taǵaıyndaldy. Bul otbasynda bala kezden eńbekqorlyqqa, adaldyqqa jáne jaýapkershilikke erekshe mán berilgen. Atalǵan qasıetter Elmıranyń mamandyq tańdaýyna da negiz boldy.
Jarylǵasynovtar áýleti – qutqarýshylardyń otbasylyq komandasy. Qanat Jarylǵasynov azamattyq qorǵaý organdaryndaǵy eńbek jolyn 2006 jyly órt sóndirýshi bolyp bastady. Keıin arnaıy oqý ornyn támamdap, ofıtser atandy jáne Qostanaı oblysynyń Meńdiqara aýdanyndaǵy Borovskoı aýylynda ornalasqan № 9 órt sóndirý bóliminiń bastyǵyna deıin kóterildi. Ákesiniń úlgisinen shabyt alǵan úlken uly Bahdııar da osy mamandyqty tańdady. Ol TJM Kókshetaý tehnıkalyq ınstıtýtyn támamdap, búginde Qostanaı oblysy TJD Azamattyq qorǵanys basqarmasynda aǵa leıtenant bolyp qyzmet etedi. Bul otbasy úshin qutqarýshy mamandyǵy – jaı ǵana jumys emes, adamdar aldyndaǵy jaýapkershilik, ózara qoldaý jáne kómekke árdaıym daıyn bolý. Áke men bala bir garnızonda qyzmet etip, otbasylyq dástúrdi jalǵastyryp keledi.
Kajkenovter áýleti – erli-zaıyptylar men qyzyn biriktirgen qyzmet. Azamat pen Lázzat Kajkenovter Qazaq KSR ІІM oqý ortalyǵynda bilim alyp júrgen kezinde tanysqan. Azamat órtke qarsy qyzmette 28 jyl eńbek etip, órt sóndirýshiden Aqmola oblysy TJD biryńǵaı kezekshi-dıspetcherlik qyzmetiniń «112» bastyǵyna deıingi joldan ótti. Lázzat 30 jyldan astam ýaqyt radıotelefonıst jáne dıspetcher bolyp jumys istedi. Ol oqys oqıǵalar týraly habarlamalardy qabyldap, tıisti bólimshelerdi shaqyrý ornyna jiberýmen aınalysty. Otbasylyq dástúrdi olardyń qyzy Aıgerim Kajkenova jalǵastyrdy. Ol Kókshetaý qalasyndaǵy órt sóndirý bóliminde radıotelefonıst mamandyǵyn tańdady. Ata-anasynyń ónegesi jas mamanǵa kásibı sheberligin shyńdap, halyqtyń qaýipsizdigin qamtamasyz etýge óz úlesin qosýǵa kómektesedi.
Saǵynaevtar áýleti – birneshe urpaqqa jalǵasqan órt sóndirý isine adaldyq. Saǵynaevtar otbasy Aqmola oblysynyń Astrahan aýdanynda órtke qarsy qyzmettegi áýletterdiń biri retinde tanymal. Áýlettiń úlken ókili Baltash Saǵynaev kóptegen jyl boıy órtke qarsy qyzmette eńbek etip, zeınetke shyqty. Onyń inisi Janbolat Astrahan aýdanynyń № 7 órt sóndirý bóliminde júrgizýshi bolyp qyzmet atqardy. Áke jolyn uly Saıan Saǵynaev jalǵastyrdy. Ásker qataryndaǵy qyzmetin aıaqtaǵannan keıin ol azamattyq qorǵaý organdaryna jumysqa ornalasyp, Astrahan aýdanynyń № 19 órt sóndirý bóliminde aǵa órt sóndirýshi bolyp eńbek etedi. Janbolattyń uly Qanat ta otbasylyq isti jalǵastyrýǵa nıetti. Osylaısha, adamdarǵa qyzmet etýge jáne olardy órtten qorǵaýǵa degen umtylys Saǵynaevtar otbasynyń mańyzdy dástúrine aınaldy.
TJM júıesindegi otbasylyq áýletter – bul tek kópjyldyq eńbek ótili men kásibı jetistikter ǵana emes. Bul – eń aldymen bilim men tájirıbeniń sabaqtastyǵy, ózara qoldaý jáne jas qyzmetkerlerge qutqarýshy mamandyǵyn sanaly túrde tańdaýǵa úlgi bolatyn ónege. Osyndaı árbir tarıhtyń artynda adam ómiri men qaýipsizdigin basty orynǵa qoıatyn jandar tur.
Osyǵan deıin kınologııa salasyna 30 jyldan astam ýaqytyn arnaǵan azamat týraly jazdyq.
