Qazaqstan TJ-ǵa shuǵyl den qoıý úshin biryńǵaı tsıfrlyq radıo jelisin qurady
ASTANA. KAZINFORM — 2025 jyldyń basynan bastap Qazaqstanda azamattyq qorǵaýdyń memlekettik júıesi sheńberinde vedomstvoaralyq ÝQT radıobaılanysty damytý boıynsha aýqymdy jumys júrgizilip jatyr, dep habarlaıdy TJM baspasóz qyzmeti.
Vedomstvo málimetinshe, búgingi tańda TMD-da bul júıeniń analogtary joq.
Tótenshe jaǵdaılar mınıstrliginiń, Іshki ister mınıstrligi men Ulttyq ulan radıobaılanysynyń shashyrańqy trankıngtik jelilerin biriktirý boıynsha uıymdastyrý-tehnıkalyq is-sharalar ótkizildi. Bul qyzmetter arasynda biryńǵaı baılanys platformasyn qurýǵa negiz boldy.
Jańa bazalyq stantsııanyń ıntegratsııalanýynyń arqasynda Pavlodar men Túrkistan qalalarynda tsıfrlyq radıo jelisine qosylǵan 12-shi jáne 13-shi óńirge aınaldy. Bul eldiń basqa óńirlerine de qosylýǵa serpin berdi.
Jelini damytý sheńberinde Shymkent, Abaı, Petropavl, Qyzylorda jáne Aqtaý qalalarynda taǵy 8 trankıngtik bazalyq stantsııa engizý josparlanyp otyr. Budan basqa qoldanystaǵy bazalyq stantsııalar Almatydan Qostanaıǵa, Túrkistannan Kókshetaýǵa beriletin bolady. Aqtóbede montajdaý jumystary bastaldy.
Jelini paıdalanýshylar sanyn ulǵaıtý jáne radıobaılanystyń materıaldyq-tehnıkalyq bazasyn nyǵaıtý úshin aýqymdy tehnıkalyq qaıta jaraqtandyrý júzege asyrylady.
Shymkent, Aqtóbe, Abaı, Shyǵys Qazaqstan, Jambyl, Qostanaı, Qaraǵandy, Qyzylorda, Mańǵystaý, Pavlodar, Soltústik Qazaqstan, Ulytaý, Aqmola jáne Túrkistan oblystarynyń departamentteri 1141 alyp júretin radıostantsııa, PTT úlken knopkasy bar 350 garnıtýra, 67 mobıldi jáne 24 statsıonarlyq radıostantsııa, 35 spýtnıktik telefondar, 22 ushqyshsyz ushý apparaty, 11 alyp júretin jáne 27 statsıonarlyq retranslıator satyp alady.
— Radıobaılanysty aýqymdy tsıfrlandyrý elimizdiń túkpir-túkpirindegi radıostantsııalar arasynda biryńǵaı, aýqymdy baılanys platformasyn qurýǵa múmkindik beretin tehnologııalyq serpilis bolady. Bul baılanystyń sapasy men senimdiligin arttyryp qana qoımaı, tótenshe jaǵdaılar kezinde úılestirýdi aıtarlyqtaı jedeldetedi. Sandyq radıobaılanys — bul tek tehnologııalyq jetistik emes, ásirese haos, táýekel jáne boljaý múmkin emes jaǵdaılarda qazirgi zamanǵy qutqarý júıesiniń negizi. Onyń engizilýi men damýy azamattyq qorǵaýdy jańǵyrtýda sheshýshi ról atqarady jáne elimizdiń kez kelgen ýaqyttaǵy syn-tegeýrinderge den qoıýǵa daıyndyǵyn nyǵaıtady, — dep atap ótti mınıstrlik.
Buǵan deıin taýǵa baratyn týrıster TJM-ge onlaın habar bere alatyny málim boldy.