Qazaqstan tutynýshylarynyń belsendiligi tómen - S. Áıimbetov
ASTANA. 15 qazan. QazAqparat - Qazaqstan tutynýshylarynyń belsendiligi tómen bolyp otyr. Búgin Parlament Májilisinde Básekelestikti qorǵaý agenttigi qyzmetiniń negizgi baǵyttary taqyrybynda ótken Úkimet saǵatynda Ekonomıkalyq damý jáne óńirlik damý komıtetiniń tóraǵasy depýtat Seıitsultan Áıimbetov osyndaı pikiir bildirdi.
Depýtattyń aıtýynsha, tutynýshylardyń quqyqtaryn qorǵaý halyq úshin eń ózekti másele. «Damyǵan elderdiń tutynýshylar quqyqtaryn qamtamasyz etý salasyndaǵy quqyqtyq retteý jónindegi tájirıbesi memlekettik jáne memlekettik emes organdardyń kúsh-jigerin biriktirip, tutynýshylar quqyqtarynyń jańa pármendi nysandaryn qurýdy rastap otyr. Árıne, bizdiń monopolııaǵa qarasty vedomstvomyz ben memlekettik organdarymyz osy baǵytta belgili bir jumystar júrgizip keledi. Alaıda kórsetkishterge júginsek mynany baıqaımyz: 2011 jyly ákimdikter men qoǵamdyq birlestikterge tutynýshylardan 6,5 myń ótinish kelip túsken. Salystyrý úshin aıtar bolsaq, Reseı tutynýdy qadaǵalaý organdaryna osy kezeńde tutynýshylardan 400 myń ótinish kelip túsipti. Sonda Qazaqstannyń 10 myń azamatyna nebári 4 ótinishten ǵana kelip otyr. Al Reseıde bul kórsetkish 30 ótinishten kelgen, ıaǵnı 7,5 esege artyq. Keltirilgen málimet Qazaqstan tutynýshylarynyń belsendiligi tómen ekendigin ańǵartady», - deıdi depýtat.
Onyń aıtýynsha, bul tutynýshylyq saýattylyq jáne óz quqyqtaryn qorǵaý máseleleri boıynsha halyqty habardar etý men oqytý júıesiniń áli de bolsa álsiz ekenin kórsetedi.
