«Qazaqstan tutynýshylary lıgasy» tutynýshylar bilimin arttyrý máselesin kóterdi

ALMATY. 8 aqpan. QazAqparat /Erbol Turymbetov/ - Qazaqstan tutynýshylar lıgasy aldaǵy qyrkúıek aıyna deıin tutynýshylar quqyǵyn qorǵaý týraly jańa oqýlyq jáne ádistemelik qural daıyndaıtyn bolady.

Bul týraly búgin Qazaqstan tutynýshylary ulttyq lıgasynyń prezıdenti Svetlana Romanovskaıa Almatyda ótken baspasóz máslıhatynda aıtty. QR «Tutynýshylar quqyǵyn qorǵaý týraly» Zańynyń 9-babyna sáıkes, 2010 jyldyń 4 mamyrynan bastap mindetti tutynýshylyq bilimdi engizý qarastyrylǵan. Osyǵan oraı, «Qazaqstan tutynýshylary lıgasy» Zańdy tulǵalar birlestigi qaýymdastyǵy JOO-ǵa arnap «Tutynýshylar quqyqtaryn qorǵaý salasyndaǵy tájirıbelik-teorııalyq aspektiler» atty oqýlyq jáne ádistemelik qural jasaý jóninde bastama kóterip otyr.

«Burynǵy shyǵarylǵan oqýlyq 1991 jyly tutynýshylar quqyǵyn qorǵaý týraly zańǵa sáıkes alǵash ret Qazaqstan tutynýshylary lıgasy tarapynan óńdelip, álemniń 27 eline beıimdelgen bolatyn. Al qazirgi tańda «Tutynýshylar quqyǵyn qorǵaý týraly» jańa zańnyń qabyldanýyna baılanysty ony jetildirý qajet», - dedi tutynýshylar lıgasynyń prezıdenti.

Onyń aıtýynsha, atalmysh oqýlyq pen ádistemelik qural qyrkúıek aıyna deıin jasalyp bitetin bolady. «Kitaptar qazaq jáne orys tilderinde 1000 danamen daıyndalady. Qajet bolsa, aǵylshyn tiline de aýdarylatyn bolady», -deıdi S. Romanovskaıa.

Jobany iske asyrýǵa «Coca-Cola» kompanııasynyń qory 20 mıllıon dollar kóleminde qarjylaı kómek kórsetip otyr.