Qazaqstan tutynatyn elektr qýatynyń 97% ekijaqty kelisimshart arqyly satylǵan – Súıindik Aldashev

NUR-SULTAN. QazAqparat – Qazaqstan tutynatyn elektr energııasynyń 97 paıyzy ekijaqty kelisimshart arqyly satylǵan. QR Parlamenti Senatynyń depýtaty Súıindik Aldashev osyndaı pikir bildirdi, dep habarlaıdy QazAqparat tilshisi.

«Energetıka kásiporyndarynyń affılırlenýi jáne elektr energııasy naryǵyndaǵy olıgopolııa da ózekti problema bolyp tur. Qazaqstandaǵy elektr energııanyń 65 paıyzyn 5 kompanııa generatsııalap otyr. Qalǵandaryna 36 paıyz ǵana tıesili. Atap aıtsaq, «Samuryq-Energo» (31%), Eýrazııalyq top (17%), Kazakhmys Energy (7%), Ortalyq Azııa elektr-energetıkalyq korporatsııa (5,4%) jáne qazaqstandyq kommýnaldyq júıeler (6%) ózara bólisip otyr», - dedi ol senat qabyrǵasynda ótip jatqan dóńgelek ústelde.

Onyń aıtýynsha, salada qarjylyq ashyqtyq joq.

«Onyń ústine tutynylatyn elektr energııasynyń 97%-y ekijaqty kelisimshart arqyly satylǵan. Qalyptasqan júıe qarjylyq ashyqtyqtyń joqtyǵymen, tarıfterdi memleket tarapynan reteýdiń qıyndyǵymen erekshelenedi. Mundaı jaǵdaıda elektr energetıksyndaǵy báseke týraly aıtýdyń ózi artyq», - dedi depýtat.