Qazaqstan túrmelerindegi 1 myńnan astam áıel raqymshylyqqa ilinýi múmkin
ASTANA. KAZINFORM — Іshki ister mınıstri Erjan Sádenov Májilis depýtattarynyń túrmede otyrǵan áıelderdiń bir bóligine raqymshylyq sharasyn qoldaný týraly saýalyna jaýap berdi.
— Búgingi tańda 6 399 áıel qylmystyq quqyq buzýshylyq jasaǵany úshin jazasyn ótep jatyr. Onyń 2 692-si bas bostandyǵynan aıyrý oryndarynda ustalsa, 3 707-si probatsııalyq baqylaýda. Qylmystyq kodekstiń 78-babyna sáıkes, aýyrlyǵy az jáne ortasha qylmystary úshin sottalǵan 1 220 áıel jazasyn óteýden bosatylýy múmkin. Sonymen qatar, zorlyq-zombylyqqa baılanysty emes qylmystar jasaǵany úshin 2 002 áıel sottaldy, olardyń 1 766-sy alǵash ret, al 150-i aýyrlyǵy shaǵyn jáne ortasha qylmystar jasaǵan. Óz kezeginde aýyr jáne asa aýyr qylmystar jasaǵan 5 055 áıelge jaza merzimi qysqartylýy múmkin, — dep jazylǵan jaýapta.
Mınıstrlik jaýabynda raqymshylyqty qaraý kezinde jasalǵan qylmystyń aýyrlyǵymen qatar, sottalǵandardyń áleýmettik jaǵdaıyn qosymsha eskerý qajettigi aıtylǵan.
Resmı derek boıynsha, sottalǵandardyń ishinde 29 áıeldiń múgedektigi bar (I top — 3, II top-3, III top — 15), 60 jastan asqan 243 áıel (TM-152, PQ-91), 13 júkti áıel, 58 kishkentaı balalary bar (3 jasqa deıin) jáne 226 kópbalaly ana bar.
— Bas bostandyǵynan aıyrýdy jazanyń neǵurlym jeńil túrine aýystyrý jolymen (3 910) ótelmegen talap-aryzdary bar áıelder úshin jazany jeńildetýdi kózdeý qajet. Alaıda, Qazaqstan Respýblıkasy Konstıtýtsııasynyń 14-babynyń talaptaryn eskerý qajet, oǵan sáıkes zań men sot aldynda barlyǵy teń. Eshkimdi jynysyna baılanysty kemsitýge bolmaıdy. Áleýmettik osal adamdar sanatyna jatatyn sottalǵan erler sany — 920 adam (I jáne II toptaǵy múgedektigi bar adamdar, múgedek balalardy tárbıelep otyrǵan UOS qatysýshylary, zeınetkerler, tolyq emes otbasylar). Sonymen qatar, birinshi ret sottalǵandardy jáne zorlyq-zombylyqsyz qylmystar jasaǵandardy bosatý máselesi jábirlenýshilerdiń quqyqtaryn qorǵaýdy eskere otyryp, odan ári taldaýdy qajet etedi. Osylaısha, eki myńnan astam sottalǵandy bosatý bıýdjetti kúnine 5,8 mln teńgege deıin únemdeýge múmkindik berýi yqtımal (1 sottalǵanǵa jalpy shyǵyndar kúnine — 2 900 teńge, tıisinshe jylyna — 2,1 mlrd teńge), — delingen jaýapta.
Buǵan deıin esirtki isimen túrmede otyrǵandar jazasyn qaı jaǵdaıda jeńildete alatynyn jazǵan edik.