Qazaqstan túrmelerinde VIP-blok bar ma
ASTANA. QazAqparat - Qazaqstannyń túzetý mekemelerinde bas bostandyǵynan aıyrylǵan tulǵalardyń belgili bir sanatyna arnalǵan VIP-bloktar joq, dep málimdedi QR Іshki ister mınıstriniń orynbasary Rashıd Jaqypov jýrnalıster suraǵyna jaýap bere otyryp.
«Qazaqstan Respýblıkasynyń túzetý mekemelerindegi ustaý sharty Qylmystyq-atqarý kodeksinde kórsetilgen jáne onda bas bostandyǵynan aıyrylǵan tulǵalardyń belgili bir sanatyna arnalǵan VIP-bloktar qurý qarastyrylmaǵan. Sol sebepti Qazaqstanda jaza óteýge arnalǵan VIP-bloktar joq», - dedi ol Ortalyq kommýnıkatsııalar qyzmetinde ótken baspasóz máslıhatynda.
Buǵan deıin QR Іshki ister mınıstri Qalmuhambet Qasymov Qazaqstanda aralas rejimdegi kolonııalar turǵyzylatynyn habarlaǵan edi. Bul baǵyttaǵy jumystar bas bostandyǵynan aıyrylǵan adamnyń týystarymen qarym-qatynasyn úzbeý úshin jasalyp otyr.
«Biz bas bostandyǵynan aıyrylǵandar ózderiniń otbasymen baılanysty úzbeýi úshin jaqyn mańdaǵy aýmaqtarda bolǵanyn qalaımyz. Alaıda túgel oblystarda barlyq rejimderdi qamtı almaımyz, sebebi bul aýyrtpalyq memleketke salmaq túsiredi», - dedi ishki ister mınıstri komıssııa otyrysyna qatysýshylardyń saýalyna jaýap berý barysynda.
Osy oraıda Qasymov bul máseleni sheshý úshin Qazaqstanda aralas kolonııalardyń qurylysy josparlanyp otyrǵanyn jetkizdi. «Atap aıtqanda, bir kolonııa tek qatań tártipte ǵana bolmaıdy, ıaǵnı barlyq rejimderdi qamtıtyn kolonııalar salynady. Osy rette 1500 adamǵa arnalǵan mekemede 500-i qatań tártiptegiler, taǵy 500-i jalpy rejim, sondaı-aq qalǵanynda erekshe tártiptegiler bolady. Bul arqyly biz ár oblystyń adamdaryn óziniń turǵylyqty óńirinde qamaýda ustaı alamyz», - dep túsindirdi mınıstr .
