Qazaqstan túrmelerinde sheteldik 1821 azamat jazasyn ótep jatyr - I. Merkel
Eske sala keteıik, jıyn barysynda «Qazaqstan Respýblıkasy men Rýmynııa arasyndaǵy sottalǵan adamdardy berý týraly shartty ratıfıkatsııalaý týraly» zań jobasy maquldanǵan bolatyn.
«Qazaqstannyń qylmystyq atqarý júıesinde jazalaryn ótep jatqan sheteldik sottalýshylarǵa keletin bolsaq, bul kórsetkish turaqty emes. Keı jyldary eki myńǵa jetedi, keıde odan da asady. Búgingi kúni bas bostandyǵynan aıyrylǵan 1821 shet memlekettiń azamaty Qazaqstannyń túzeý mekemelerinde jazalaryn ótep jatyr», - dedi I. Merkel.
Onyń aıtýynsha, osy baǵyttaǵy jumystar belsene túskendikten byltyrǵy jyly shamamen qyryqqa jýyq sottalǵan sheteldik azamat óz elderine jazasyn óteý úshin qaıtaryldy. Bıyldyń ózinde bas bostandyǵynan aıyrylǵan 23 adam da shet eldiń suraýlaryna oraı berilgen.
«Bul sharýa (sottalǵan sheteldikterdi jazasyn óteý úshin óz elderine qaıtarý) nege belsendi júrgizilmeıdi degenge kelsek, jazasyn óz elderinde óteý úshin qaıtarýǵa sottalýshynyń ózi kelisimin berýi tıis. Keıbir jaǵdaıda, Qazaqstannyń bas bostandyǵynan aıyrý oryndarynan Ózbekstan, Reseı azamattary óz elderine ketkisi kelmeıdi. Buǵan bir sebep bizdegi túzeý mekemeleriniń jaǵdaıy atalǵan elderge qaraǵanda áldeqaıda jaqsy bolyp otyr», - dedi Bas prokýrordyń orynbasary.
Budan bólek, I. Merkel shet memleketterde bas bostandyǵynan aıyrylǵan qazaqstandyqtarǵa da toqtalyp ótti. Onyń aıtýynsha, qazir kóptegen eldermen sottalǵandardy berý týraly sharttar jasalyp, sonyń negizinde el azamattaryn Qazaqstanda jazasyn óteý úshin qaıtarý jaqsy jolǵa qoıylyp keledi. «Germanııadan, Ispanııadan sottalǵan Qazaqstan azamattary qaıtaryldy. Shveıtsarııa men Chehııada da osyndaı ister atqaryldy. Eń kóp qaıtarylǵan el Reseı - bıylǵy jyldyń ózinde sottalǵan 36 qazaqstandyq elge qaıtarylyp, olar jazalaryn ótep jatyr», - dedi I. Merkel.
