Qazaqstan túrmelerinde otyrǵandardyń 40 paıyzy 2 nemese odan kóp sottalǵandar - J. Asanov

ASTANA. QazAqparat - Qazaqstan túrmelerinde otyrǵandardyń 40 paıyzy 2 nemese odan kóp sottalǵandar. Bul týraly búgin Astanada «Túrme reformasynyń» ІIІ forýmynda QR Bas prokýrorynyń orynbasary Jaqyp Asanov málim etti. Eske sala keteıik, «Sen qoǵamǵa kereksiń!» atty jobanyń bastaýyna aınalatyn bul forým buryn sottalǵan adamdardy zańǵa baǵynýshy azamattar retinde qoǵamǵa reıntegratsııalaýǵa baǵyttalǵan.

Jaqyp Asanovtyń aıtýynsha, Qazaqstannyń qylmystyq quqyq salasynda probatsııanyń tolyq tsıklyn engizý búgingi kúni ózekti máselege aınalyp otyr. Bul rette Bas prokýror orynbasaryn damyǵan elderde probatsııa tetigi barlyq satylarda: sotqa deıin, túrmede jáne túrmeden keıingi kezeńde de qoldanylatynyn atap ótti.

«Máselen, osyndaı tetik engizgendikten Danııa, Norvegııa, Shvetsııa elderinde túrme ındeksi tómen. Gollandııany alyp qarasańyz halyq sany Qazaqstanmen teńdeı, alaıda túrmedegiler sany olarda bizdikinen 3,5 esege az. Olarda bundaı júıe jaqsy joǵa qoıylǵan. Al Qazaqstanda probatsııa sotqa deıingi kezeńde de, túrmede de engizilmegen», - deıdi Jaqyp Asanov.

Onyń aıtýynsha, búgingi kúni Qazaqstan túrmelerindegilerdiń 40 paıyzynyń sottylyǵy 2 nemese odan kóp bolyp otyr.

«Sottalǵandardyń 71 paıyzynyń kesilgen jaza merzimi 5 jyldan joǵary. Al olar bostandyqqa shyqqanda ne bolady? 10 sottalýshynyń 4-eýi bosap shyqqannan keıingi úsh jylda qaıta túrmege túsýge beıim eken. Túrmedegilerdiń ózinde bolashaqqa degen senim joǵalyp barady, 4 jylda óz ózine qol jumsaýdyń 154 faktisi tirkeldi. Al psıhologtardyń aıtýynsha, adam bes jyl boıyna qoǵamnan oqshaýlanǵannan keıin áleýmet arasyndaǵy ómir men tirshilik daǵdylarynan aıyryla bastaıdy. Sondyqtan da, bizge adamnyń túrmeden bosap shyǵýyn kútip otyra bermeı, olarmen sol oryndarda jumysty bastaǵan durys. Bul úshin barlyq damyǵan elderdegideı probatsııanyń sotqa deıingi jáne penıtentsıarlyq modelin engizý kerek», - dedi J.Asanov.